Nchrăp an rơh vơt tết nguyên đán, tâm ba n năp nơh, nkual wăng sa Nghi Sơn n’hanh ăp nkual công nghiệp tât kan lĕ geh pă an đoàn viên, nuĭh pah kan rlău 7.300 nklâm ndơ đah lĕ rnoh prăk khlăy rlău 4,5 rmen prăk.

Ntoh ngơi ta aơ, Thủ tướng Phạm Minh Chính njoăl tât lĕ rngôch cán bộ, oh yuh nuĭh kan, nuĭh pah kan, ndơn kan an ăp rnăk dơi kơl, rnăk geh nău rêh jêr jŏt nău rhơn , nău ôp khâl n’hanh njoăl nău rhơn ueh. Thủ tướng lah na nê̆, đah nău mĭn uănh kon nuĭh lah nău tơm, nkô̆ mpŏng, lah nău nsrôih, lah rnoh hun hao. Đảng, ngih dak way geh mât uănh gay ma nuĭh ƀon lan geh nău rêh ăp nar lơ ma hơm răm đăp mpăn. Thủ tướng ŭch nuĭh ach o, dăch ach o an geh n’hao tay lơn nău nsrôih, nău kan n’hanh nău ŭch hun hao bah ach o nâp nâl. Oh nô nuĭh pah kan, nuĭh kan an geh nsrôih rlet rlău nău jêr jŏt an đăp mpăn nău rêh jêng.