Kêng măng 27/5, ta ntŭk kan Chính phủ, Thủ tướng Chính phủ Phạm Minh Chính hŏ vơt wa Manuela V.Ferro, Groi Kruanh Ngân hàng lam ntur neh dôl khâl ndrel pah kan ta Việt Nam. Thủ tướng Chính phủ ntoh nau ryơk ăp nau nsôih bah Ngân hàng lam ntur neh đah nau hun hao văng sa, rêh jêng bah Việt Nam ntơm năm 1993 tât rnôk aơ, đah rnoh tơm prăk tât 24 rmen đôla; nau ŭch Ngân hàng lam ntur neh lŏ hăn ndrel, kơl an Việt Nam ƀư ăp bôk nau kan, nau kơl gay ntrŭt ăng nau hun hao nâp nâl, hun hao ndrih, văng sa mrô, văng sa ueh, văng sa tâm pă, văng sa blau.

Groi Kruanh Ngân hàng lam ntur neh Manuela V. Ferro mbơh, Ngân hàng lam ntur neh hŏ rnơm ndrel ndŏ ntŭk kan nkuăl Ngân hàng lam ntur neh bah 3 dak: Việt Nam, Lào, Campuchia ta Hà Nội; lah rjăp Ngân hàng lam ntur neh ŭch ndrel mra tâm boh ueh ngăn đah Việt Nam gay dơi geh nau kan bah Văn phòng tâm nkuăl pah kan săk tam, leo nsĭt văng sa ueh ân 3 neh dak./.