Kêng măng 27/3, ta Nhih pah  kan Chính phủ, Thủ tướng Chính phủ Phạm Minh Chính hŏ wơt Bộ trưởng hun hao wăng sa,  tăch rgâl dak bah dih n’hanh ntrŭt ntrôl ngăch tăch n’gluh Canada Mary Ng dôl khâl, pah kan ta Việt Nam.

Thủ tướng Phạm Minh Chính n’hanh Bộ trưởng Mary Ng rhơn yor tâm boh tâm brê lam lĕ rngôch bar dak dôl  hun hao jru mpeh ăp ntil. Aƀaơ Canada lah dak tâm boh tăch rgâl têh tâl 3 bah Việt Nam tâm nkual  Châu Mỹ n’hanh Việt Nam lah dak tâm  boh tăch rgâl dŭt têh bah Canada tâm nkual ASEAN. Yơn lah, săk geh tâm boh hun hao đah bar dak  dŭt têh, lơn lah tâm ăp trong kan bar ding săk geh n’hanh  geh nău tâm ntop kơl nsum âk; ân mât dŏng, ndăn geh dŭt âk ăp săk geh dja ma ăp  trong tâm boh bar ding n’hanh âk ding. Thủ tướng Phạm Minh Chính dăn đă bar ding kan nsum tay lhăt  gay ntrŭt ntrôl tâm boh ta lĕ rngôch ăp trong kan tăch rgâl, ntuh kơl, ndơ̆ rgâl kloh uĕh,  rgâl mbrô, công nghiệp công nghệ mhe, công nghiệp nkret njêng, rdâng lơh rgâl trôk nar, ŭnh nar, khoa học công nghệ, ntĭm nti… 

Thủ tướng Chính phủ lah uĕh n’hanh ŭch rŏng Canada uănh khlay tay, nta trong dơh lơn đŏng gay nsum mpôl nuĭh Việt Nam ta Canada gŭ rêh, kơt nti, wăng sa dơh uĕh, đăp mpăn ta dak tơm jay; ŭch rŏng Canada kơl tay học bổng an kon se  nti, sinh viên Việt Nam hăn tât kơt nti ta Canada.