Nar 18/3, ta Nhih pah kan Chính phủ, Thủ tướng Chính phủ Phạm Minh Chính hŏ wơt Bộ trưởng Ngoại giao Uzbekistan Bakhtiyor Saidov dôl khâl ngăn Việt Nam ntơm bah nar 17 - 19/3/2024. 

Ta rơh wơt, Thủ tướng Chính phủ nsing nơm hăn khâl bah Bộ trưởng Bakhtiyor Saidov mbra rgop khlay tâm nău ntrŭt ntrôl n’hanh pơk hvi tâm boh bar ding tâm let năp tay. Thủ tướng an lah, ta jâng nsing tâm boh tâm rnglăp way ơm, ân ntrŭt ntrôl tâm boh du trong lam lĕ rngôch ăp trong kan Đảng, Chính phủ, Quốc hội ma trong tâm khâl mpôl kan gưl têh; tâm ban kơt njêng trong tâm boh mhe  đah ăp n’gâng kan. Lơn lah bar ding ân kan nsum gay ƀư geh nău tam rơh mâp đah ăp doanh nghiệp n’hanh ăp n’gor bar dak tâm nar aơ (19/3). Thủ tướng Chính phủ Phạm Minh Chính dăn đă bar dak ân ntrŭt ntrôl lơn đŏng tâm boh mpeh ntĭm nti, văn hóa-nghệ thuật, pâl nđaih n’hanh tâm nđŭr ƀon lan, tâm mâp đah ăp  mpôl kan chính trị-rêh jêng kon nuĭh kơt sinh viên ơm, druh ndăm rgop n’hao nău tâm gĭt wât nsum an rơh kơn mom  ndăm n’hanh bun dăp nău tâm rnglăp đah ƀon lan bar dak./.