Kêng măng (5/6), Thủ tướng Phạm Minh Chính hŏ wơt Groi Thủ tướng, Bộ trưởng Ngoại giao New Zealand Winston Peters dôl hăn khâl ngăn Việt Nam. Thủ tướng lah rjăp, Việt Nam way uănh khlay hun hao  tâm boh têh jong đah New Zealand.

Tâm let năp tay, Thủ tướng dăn đă bar ding nsrôih an ƀư jêng ngăn ngăn ăp nău tâm  ton gưl têh ma ăp trong nchrăp kan, nău tâm boh, rgop n’hao tâm boh bar dak hao prêh mhe; n’hao âk tơ̆ tâm khâl gưl têh n’hanh ăp gưl, ntrŭt ntrôl tâm boh wăng sa- tăch rgâl- ntuh kơl hôm soih dŭt âk,  ơm nsĭt geh  tăch rgâl bar ding tât 3 rmen USD tâm 2 năm tât. Bar ding tâm ban ŭch tâm boh tay lhăt n’hanh tâm kơl nsum ta ăp rơh rgum nchră âk ding; tâm ban ŭch kan nsum geh nău tam tâm rnôk Việt Nam dơn mât bôk kan tâm boh ASEAN - New Zealand (7/2024 - 7/2027). Tâm ôp mpeh nkô̆ nău dak lêng, bar ding tâm ban ŭch nău mĭn nsum bah ASEAN mpeh nkô̆ nău dak lêng, nkra ăp nău tâm pit ma trong đăp mpăn nsing kalơ luật pháp dak bah dih, tâm nê geh UNCLOS 1982, đăp mpăn, rnă njrăng, dah rŏng nchuăn rdeng dak lêng n’hanh trong trôk ta mpăr rlău dak lêng.