Kêng măng (22/12), ta nhih pah kan Chính phủ, Thủ tướng Phạm Minh Chính ƀư tơm rơh hop bah Hội đồng tâm rlong nkhôm rnê năm kan 2021-2025. Ta rơh hop, Hội đồng ƀư ra uănh tay lam lĕ rngôch ăp nău kan, nău nchrăp an Đại hội Tâm rlong rŏng dak lam dak tâl XI ƀư tâm nar 26-27/12; nkre mĭn uănh an trong nchrăp mpeh nău mĭn uănh ntăm an săk ntơ lư "Anh hùng lực lượng vũ trang nhân dân", "Anh hùng Lao động" an ăp mpôl, ăp nuĭh. Đại hội Tâm rlong rŏng dak lam dak lah nar kan chính trị têh khlay bah neh dak, uănh tay du njăr trong tâm rlong 5 năm aơ- du năm kan dŭt n’hâm mha êng, âk nkô̆ nău mô hŏ tă geh. Đại hội hôm lah ntŭk wăch rgum, rêng lam nuih n’hâm rŏng dak, nău mĭn rôih dăng nsan hao, nău nđơr geh bah lam rnoi nuĭh, pơk luh du rơh tâm rlong mhe, ndơ̆ neh dak hun hao têh dăng, hơm răm, srăch uĕh, rhơn mƀak.

Lah n’glôch jêh rơh hop, Thủ tướng Phạm Minh Chính mpư rnê ăp tiểu ban hŏ dŭt nsrôih rgum tĭng ƀư jăp nău dơn kan tâm pah kan nchrăp ƀư Đại hội Tâm rlong rŏng dak. Thủ tướng njrăng đă ân tĭng ƀư dĭl ăp rơh pla n’hơ nkoch mbơh nău dơi wăng sa- rêh jêng kon nuĭh bah neh dak lôch 40 năm rgâl mhe; pla n’hơ rup đah nkô̆ "Tâm rlong rŏng dak- yor du Việt Nam têh dăng". Ndrel đah nê, ƀư mbơh lư mpeh Đại hội rdâk tay dăng nuih n’hâm rŏng dak, n’hao êng săk bah rnoi nuĭh, ring lam jru trong leo ƀư tâm rlong tâm lam rêh jêng kon nuĭh, njêng suan ntrôl, rêng nău nđơr an hun hao neh dak tâm ăp năm bah kơi tay./.