Nar 17/12, ta Nhih pah kan Chính phủ, Thủ tướng Phạm Minh Chính ƀư tơm rơh hop uănh năl lôch jêh geh an ƀư “Trong kan ndăng Quang Trung” ntop kơl nuĭh ƀon lan nkra bah khuch khat lôch dak bŭk, dơi pơk ƀoh đah ăp n’gor, nkual ƀon têh ntơm bah Hà Tĩnh tât Lâm Đồng. Lôch ra uănh tay, rnoh jay ân rdâk mon mhe hao tay, aƀaơ hŏ geh 1.622 mblâm jay hŏ rdâk ƀư, hao 651 mblâm đah nău mbơh bah năp nê nơh.

Mpư rnê ăp n’gor kơt Dak Lak, Gia Lai, Đà Nẵng nsrôih an ƀư tâm bah ri aơ nơh, Thủ tướng lah rjăp nuih n’hâm “Trong kan ndăng Quang Trung” mô geh nău nteh phao yơn ân geh nău dơi lam lĕ rngôch, njêng nău nsing nơm an ƀon lan ơm đăp mpăn nău rêh. Nău ŭch ndơ̆ luh lah ƀư wat jêh lĕ rngôch nkra jay bah năp nar 31/12/2025 n’hanh wat jêh mon mhe bah năp nar 31/1/2026. Thủ tướng dăn đă ăp n’gor, lơn lah Gia Lai n’hanh Dak Lak, lăp kan tay lĕ n’hâm suan; nkre jao an Bộ Công an, Bộ Quốc phòng, Mpôl druh ndăm ntop kơl nuĭh kan, ntik n’hao nuih n’hâm tâm ntop kơl tâm ƀon lan gay nuĭh ƀon lan ơm “đăp mpăn nău rêh pah kan jan sa”.