Ta rơh tâm mâp ƀon lan, Mpôl đại biểu Quốc hội lĕ geh mbơh nău geh rơh rƀŭn nchră tal 7, Quốc hội khóa 15 n’hanh du đê̆ nău pah kan bâh Mpôl đại biểu Quốc hội nkuăl ƀon têh ta rơh rƀŭn nchră tal 7, nkre lah gĭt dơn nău tâm rgop, dăn đă bâh ƀon lan gay ma rgum, mbơh tơih nkoch n’hơ tât ăp ntŭk kan têh ăp nău tâm rgop, nău dăn đă bâh ƀon lan ta nău dơi doh rklaih ăp nău kan tĭng nău ntrŭnh.

Ntoh ngơi ta rơh tâm mâp ƀon lan, Thủ tướng Phạm Minh Chính lĕ mbơh tât ƀon lan mpeh nău geh hun hao wăng sa rêh jêng bâh neh dak, ăp nău kan, trong kan tơm tâm let năp tay. Ndrel đah nĕ Thủ tướng lĕ nchŏng đă du đê̆ trong kan hun hao Cần Thơ tâm ba năp nơh n’hanh ơh na nê̆ ăp nău ôp ma ƀon lan geh mbơh tơih.