Nău kan aơ ta ntŭk Cần Thơ - Hậu Giang n’hanh nău nchrăp kan ntŭk Hậu Giang - Cà Mau bâh nău nchrăp kan ƀư trong têh Bắc  -Nam mpeh luh nar lvang năm 2021-2025, đah lĕ rnoh ntuh kơl an rlău 10.370 rmen prăk.

Ta ntŭk pah kan, Thủ tướng Chính phủ lĕ pă ndơ rgŏ jă ăp ntŭk kan , nkre lah đă ƀon lan n’gâng kan ta ntŭk rgum lĕ trong kan chính trị, ƀon lan lăp kan, ndrel ƀư njêng nău tâm rlong ta ntŭk pah kan. Nkre lah, Thủ tướng đă ăp ntŭk pah kan dŏng khoa học công nghệ đah lĕ rngôch ăp nău kan kĩ thuật gay ma ntrôl dăng ngăch pah kan, yơn an geh mât đăp mpăn, ueh, nâp, nkre lah njrăng nău sa nkhiăn sa ƀer, mpŭng lir. Đah nuĭh ƀon lan tâm nkual nău kan, Thủ tướng đă ăp gâl ủy, n’gâng kan ta ntŭk an geh mât uănh, mât đăp mpăn ƀon lan tât ntŭk gŭ mhe geh nău rêh ueh lơn ta ntŭk ơm, mât đăp mpăn nău rêh an ƀon lan, bâh nĕ njêng nău săk rnglăy rgum nsum bâh trong hăn têh.