VOV4.M’nông-  Nar 18/9, Thủ tướng chính phủ Phạm Minh Chính n’hanh mpôl pah kan lĕ hăn uănh nđôi ta ntŭk, uănh năl, ntrŭt đă nău kan rdâk njêng 3 ngih dak si têh ta n’gor Hà Nam geh ntŭk kan 2 ngih dak si Lão Khoa, ntŭk kan 2 ngih dak si Việt Đức n’hanh ntŭk kan 2 ngih dak si Bạch Mai. Ăp ntŭk kan aơ geh n’gâng kan dak si an ƀư ta năm 2014, ntơm ƀư năm 2015, knơm lôch ta năm 2017, yơn lah tât aƀaơ ê hŏ geh ƀư lôch an lăp dŏng.

Thủ tướng đă n’gâng kan dak si n’hanh ăp n’gâng kan, ntŭk kan uănh năl na nê̆ ăp nău kŏ khan, ngăn lah nău tih bâh ntơm njêng nău kan, mbơh tơih nău ƀư, uănh năl, tâm ton kan, ntơm rdâk njêng...ngăn lah uănh năl nkô̆ nău n’hanh nuĭh dơn kan an geh nău tât mbrơi, nău kŏ văk aơ. Tĭng nău mbơh bâh groi Thủ tướng nău ntuh kơl ăp ngih dak si aƀaơ lĕ ƀư mbrơi âk năm, roh prăk ntuh kơl. Nkô̆ nău bâh nău aơ lah bâh ăp nău mô dơi leo kan, mbrơi bâh nău ƀư nchrăp kan, mbơh nău, uănh năl nău nchrăp kan, nău ntrŭnh ntuh kơl, săch nuĭh dơn kan, tâm ton kan, mbơh dăn  leo ƀư n’hanh leo pah kan. Thủ tướng Phạm Minh Chính đă njêng rmôt pah kan yor nuĭh leo kan n’gâng kan dak si ƀư kruanh, đah nău tât râng bâh nuĭh leo kan ăp n’gâng kan kế hoach n’hanh ntuh kơl, rdâk njêng, tơm prăk, tư pháp n’hanh UBND n’gor Hà Nam ƀư dâl nău uănh nđôi, uănh năl tay lĕ rngôch ntrong leo kan, uănh nđôi an tâm di pháp lý, lĕ rnoh ntuh kơl, mông nar ƀư n’hanh ăp nău jêr jŏt kŏ văk êng.

Nuĭh rblang: Thị Đoắt