Nthoi tay rơh hop 31, ôi 15/3, Ủy ban Thường vụ Quốc hội an nău rgop mpeh nău rblang dăn, nkah djăt, rgâl di trong nchrăp Luật đăp mpăn hăn ntung trong tâm ban ŭch đah quy định mpăng nuĭh ƀĭt ndeh hăn trong ma tâm săk geh dak ndrui ndrănh mô lah n’hâm n’hôr geh ƀô ndrănh. 

Aơ lah nkô̆ têh, geh ring tam lĕ rngôch tât ăp nuĭh ƀĭt ndeh râng hăn trong, dơi cử tri n’hanh nău lư lam ƀon lan êng uănh khlay tâm bah ri aơ nơh. Aƀaơ trong nchrăp Luật dôl dăn nău rgop bah đại biểu Quốc hội 2 trong nkra. Yơn ăp nuĭh tâm Ủy ban Thường vụ Quốc hội tâm ban ŭch đah trong nkra bôk năp. Quy định mpăng nuĭh ƀĭt ndeh râng hăn ntung trong ma tâm săk geh ndrui mô lah n’hâm  n’hôr geh ƀô ndrănh. Chủ nhiệm Ủy ban Tư pháp bah Quốc hội Lê Thị Nga lah kloh: lôch tĭng ƀư quy định mpăng đă hŏ lăp tâm nău rêh n’hanh âk mpưm nuĭh ƀon lan tâm ban ŭch tĭng ƀư n’hanh dôl tĭng kơn jêng văn hóa “hŏ lăn ngêt ndrănh bia ri mô ƀĭt ndeh", nkre ƀư hŭch ăp rơh tâm tom ndeh tă bah ngêt ndrănh, bia lơh, Ủy ban Thường vụ Quốc hội dăn đă quy định na nê̆ mpeh mât njrăng kon se rnôk râng hăn ntung trong đŏng./.