Tổng Bí thư, Kruanh dak Tô Lâm râng ntơm ƀư. Nău nchrăp ƀư gay tĭng kơn rdâk tay ntŭk rgum tơm bah Hoàng thành Thăng Long, nkre mât ndray n'hanh mpư n'hao ăp rnoh khlay lịch sử, văn hóa bah drăp ndơ yău lam ntŭr neh. Điện Kính Thiên tă ƀư ntŭk rgum tơm bah Cấm thành Thăng Long.

Aơ lah ntŭk tơm n'gâng kan n'hanh ntŭk ƀư brah ngih dak, lah ntŭk ƀư ôp brah, ƀư brah têh n'hanh wơt nuĭh ntơh măt, lah ntŭk mpơl dŭt têh bah nău dơi ngih dak Đại Việt lĕ rngôch ăp rach năm 15 - 18. Nău nchrăp ƀư tay dơi ndâk ƀư tĭng 15 năm gŭ mĭn ăp ding mpeh lịch sử, khảo cổ học, ntŭk ntô n'hanh drăp ndơ mô mpơl săk, ndrel nău ôp uănh bah UNESCO n'hanh ICOMOS. Nkual ƀon têh Hà Nội đă rnôk mât prăp, nkra, ƀư tay an tĭng kơt khoa học, uănh khlay dŭt âk ăp nău tơm ơm n'hanh mât njrăng ăp nău ơm yău khảo cổ lĕ ntoh luh. Nău nchrăp ƀư dơi nchrŏng lah njuat ntơm khlay tâm nău ƀư tĭng trong rƀŏng rdâk nkra tay jâng gung Hoàng thành Thăng Long tât năm 2035, rgop ndơ̆ ăp rnoh khlay drăp ndơ ơm yău ntlơi an tay dăch lơn đah nuĭh ƀon lan n'hanh năch pâl nđaih.