Kêng măng 30/9, tâm rnôk hăn khâl Ngih dak tât Mông Cổ, Tổng Bí thư, Kruanh dak Tô Lâm lĕ geh rơh rgum nchră đah Kruanh Quốc hội Mông Cổ Dashzeve Amarbayagalan. Kruanh Quốc hội Dashzeve Amarbayagalan rnê rơh khâl gưl Ngih dak tât Mông Cổ bah Tổng Bí thư, Kruanh dak Tô Lâm; nsing nơm rơh khâl mbra rgop n’hao kan ndrel n’hanh ƀư jru lơn tay tâm boh “Kan ndrel lĕ rngôch Việt-Mông Cổ”; mĭn lah aơ lah nkô̆ nău ntrôl hun hao lĕ rngôch ăp ntil kan ndrel đah 2 dak tâm năm tât.

2 ding uănh lah prêh tâm boh kan ndrel, tâm nđŭr đah Quốc hội 2 dak dôl hun hao ngăch n’hanh nar lơ hăn ngăn ngên. 2 ding tâm ban ŭch mbơh ƀư săk rnglăy, lĕ rngôch ăp nkô̆ nău tâm ton kan ndrel lĕ ký đah Quốc hội 2 dak năm 2018; tâm ban ŭch n’hao nău ƀư tơm ngih pah kan ndâk njêng pháp luật 2 dak tâm nău tăm rgop ntop kơl ntrôl boăt nthoi jâng wăng sa hun hao ngăn ngên, săk rnglăy n’hanh lĕ rngôch, tâm di đah tâm boh kan ndrel lĕ rngôch; ntrôl rdâk ƀư n’hanh rgŏ jă ăp doanh nghiệp 2 dak râng ăp bôk nău kan ntrŭt ngăch tăch rgâl.