Wa Tổng Bí thư Nguyễn Phú Trọng hŏ mô hôm, an tay nău rngot klâng dŭt n’hâm đah ƀon lan, tahen lam dak. Lah nuĭh mât bôk Chính phủ, Thủ tướng Chính phủ Phạm Minh Chính rngot nkoch, păng dŭt rhơn n’hao êng n’hanh geh nău rhơn dŭt têh rnôk dơi pah kan đah Tổng bí thư Nguyễn Phú Trọng tâm 8 năm n’hanh bơi 8 khay, ta ăp nău kan êng êng, bah Ủy viên Bộ Chính trị, Ban Bí thư, Kruanh ban Tổ chức Trung ương, Kruanh Ban mât njrăng, mât chăm n’hâm suan cán bộ trung ương tât Thủ tướng Chính phủ: 

“Gâp geh nău rhơn n’hao n’hanh nău rhơn têh dơi pah kan đah Tổng bí thư Nguyễn Phú Trọng, rlău rơh pah kan n’hanh nău kơl, nta trong dơh uănh khlay bah wa gâp saơ dơi mpơl luh ăp nkô̆ nău ntoh lư bah kơi aơ. Bôk năp, wa lah du hê kruanh rđău kan ntoh lư yor nău ŭch rdâk njêng du neh dak têh ndrŏng dăng n’hanh ƀon lan dơi hơm răm ăp tŏng n’hanh geh nău nsing nơm  têh mô dơn tâm dak, nkual, ma hôm lĕ ma lam ntŭr neh đŏng”.

Rnôk hôm rêh, Tổng Bí thư Nguyễn Phú Trọng uănh kơl an ngăn tât nau hun hao bah nkuăl ƀon têh Hồ Chí Minh, ma tĭng nau bah Tổng bí thư ri aơ lah ‘du nkuăl ƀư nau kan khlay. Ntơm rnôk ndơn ƀư nŭih dâk bôk Đảng, Tổng Bí thư Nguyễn Phú Trọng hŏ geh 15 tŏ khâl ndrel ma pah kan tâm nkuăl ƀon têh moh săk Wa. Rơh hăn khâl dăch dŭt bah Tổng Bí thư Nguyễn Phú Trọng tâm lơ 23/9/2023, di rnôk nkah 77 năm Nar Nam bộ ndâk lơh. Gay rgop nau ƀư ân dơi ndrel lam dak geh dơi tât năm 2023 dak nơm jêng dak dôl hun hao geh công nghiệp nâp mhe, nau geh âk, tât năm 2045 dak nơm jêng dak hun hao, nau geh âk, ndrel ma ăp ntŭk bah nkuăl Đông Nam bộ ntrŭnh ƀư dơi nau ntrŭnh mhe bah Bộ Chính trị, Tổng bí thư Nguyễn Phú Trọng, lah rjăp:

“Gâp đă ăp đồng chí tâm Rnâng kan rđau kan Đảng bộ nkuăl ƀon têh ndrel lam ntrong kan chính trị ân geh lŏ mĭn, năl kloh nkô̆ nau, nau tă rhuăt dơi nau blau ndrel năn geh ăp nau kan, ntrong kan rklaih ân săk tam. Moh nau rlau nau dơi ri mbơh ân Trung ương, Quốc hội, Chính phủ uănh, gay ma pơk trong gay doh rklaih, tâm nê geh nau kan, nau ntrŭnh khlay, rlet rlau lơn rđil nau ntrŭnh mrô 54 bah Quốc hội gưl XIV”.

Năm 2016, Đảng bộ, n’gâng kan n’hanh ƀon lan ăp rnoi nuĭh xã Bản Bo, nkuâl Tam Đường, n’gor Lai Châu rhơn n’hao dơi wơt Tổng Bí thư Nguyễn Phú Trọng tât khâl. Tĭng ƀư nău ntĭnh ntăn bah wa tâm ăp trong hăn khâl năm nê nơh, cán bộ, đảng viên n’hanh ƀon lan ăp rnoi nuĭh ta aơ hŏ nsum suan, du nuih n’hâm, nsrôih rlău jêr jŏt, nsan hao jêng ntŭk chrat ang tâm  hun hao wăng sa, rdâk njêng ƀon lan mhe ta ntŭk. Wa Hạng A Sào, rnoi Mông, ta bản Nà Phát, xã Bản Bo, nkuâl Tam Đường an gĭt: lôch rnôk dơi mâp n’hanh dơi Tổng Bí thư Nguyễn Phú Trọng rgŏ jă, rnăk  păng hŏ nsrôih khai hoang n’hanh pơk hvi neh tăm chè bah rnăk wâl.

“Wa Trọng Tổng Bí thư dŭt uănh khlay tât wăng sa bah kônh wa. Wa tât khâl mir chè rnăk gâp n’hanh wa rgŏ jă rnăk wâl n’hanh kônh wa nsrôih rgum mât chăm mir chè gay geh wăng sa an rnăk wâl jŏ jong. Bah nău rgŏ jă bah Tổng Bí thư, kônh wa tâm ƀon hŏ nsrôih nsan hao gay mât chăm n’hanh rgum ƀư wăng sa bah mir chè n’hanh aƀaơ nău rêh bah kônh wa hŏ hơm răm, rhơn mƀak hôm”.