VOV4.M’nông – Nar 27/9/2022, ta Ngih Trung ương Đảng, wa Tổng Bí thư Nguyễn Phú Trọng ƀư tơm rƀŭn Ban Bí thư gay uănh mĭn tay, an ƀư kỷ luật ăp đồng chí: Tô Anh Dũng, Ủy viên Ban cán sự Đảng, Groi Kruanh N’gâng kan tâm rnglăp nchră nău; Nguyễn Quang Linh, nuĭh ntop kơl nău kan wa Phạm Bình Minh, Ủy viên Bộ chính trị, Groi Thủ tướng rnâng kan Chính phủ. Jêh rnôk uănh mĭn tay dăn đă bah Ủy ban Kiểm tra Trung ương, Ban Bí thư gĭt saơ: Wa Tô Anh Dũng n’hanh wa Nguyễn Quang Linh lĕ mô tŏng tiăr nti, djơh roh đah nău mĭn chính trị, nău rêh; tih nău ntrŭnh bah Đảng, pháp luật bah Ngih dak mpeh njrăng n’gang sa khâm, sa ƀer; tih nău ntrŭnh mpeh ăp điều lệ đảng viên mô dơi ƀư n’hanh nău kan n’hao prêh, ƀư khuch dŭt têh, lư nău mô uĕh, ji nuih tâm nău rêh kon nuĭh; ƀư khuch mô uĕh tât nsing nơm bah rmôt đảng. Tĭng nkô̆ nău, rnoh tih, khuch khat, nkô̆ nău tih; tĭng nău ntrŭnh bah Đảng viên tih, Ban Bí thư an ƀư kỷ luật rklaih luh Đảng đah ăp đồng chí: Tô Anh Dũng, Nguyễn Quang Linh.

Nuĭh rblang: Y Sưng Phê Ja