Nar 18/11, ta Ngih Trung ương Đảng, Rnâng kan Ban ntĭm rđău mpeh njrăng, n’gang sa khâm sa ƀer lĕ ƀư rơh rƀŭn đah nău ƀư tơm bah kruanh Tổng Bí thư Nguyễn Phú Trọng, Kruanh Ban ntĭm rđău gay tâm nchră, an rgop mpeh săk rnglăy ntĭm rđău đah du đêt nău tih, nu nău mpeh tâm Ban ntĭm rđău uănh nđôi, ƀĭt joet bah jêh rơh rƀŭn tal 21 tât aƀaơ.

N’glôn jêh rơh rƀŭn, ndrel đah nău rnê uănh lah prêh ăp săk rnglăy ntoh lư na nê̆ tâm trong kan njrăng, n’gang sa khâm sa ƀer năm bah năp, Tổng Bí thư Nguyễn Phú Trọng ntĭm kloh, trong kan njrăng n’gang sa khâm sa ƀer hôm e geh du đêt ntŭk kơt: Du đêt nău tih, nu nău mbrơi jêh mkra tĭng trong nchrăp bah Ban ntĭm rđău. Tổng Bí thư Nguyễn Phú Trọng nkoch kloh nău mĭn: Tâm njrăng n’gang sa khâm sa ƀer an ƀư dŭt n’hâm n’hanh tâm ban, dŭt n’hâm tâm ban đah ndâk njêng n’hanh dun n’gang, đah ndâk njêng lôch jêh trong ƀư gay mô hôm geh trong sa đah nău ƀư tĭng ăp trong mkra njrăng n’gang sa khâm sa ƀar; đah n’hao uănh nđôi, groi uănh, kiểm toán gay saơ sam khâm sa ƀer đah uănh nđôi, phong, rmal tih dôih.