Tổng Bí thư Nguyễn Phú Trọng rêh du  nău rêh an neh dak, an ƀon lan tât 80 năm nău rêh, bơi 57 năm Đảng, 14 năm ƀư Tổng Bí thư, rlău 2 năm hao ƀư Kruanh dak, rlău 5 năm hao ƀư Kruanh Quốc hội. Ta lĕ rngôch ăp ntŭk hao gŭ kan, wa Nguyễn Phú Trọng way mĭn rvê, lĕ nuih n’hâm đah n’gâng kan cách mạng bah Đảng n’hanh rnoi nuĭh, ndrel đah Trung ương Đảng, Chính phủ rđău đă lam Đảng, lam ƀon lan, lam tahen geh ăp nău dơi têh kuâng. Ăp nău lah, nău rgop nkah uĕh bah Tổng Bí thư Nguyễn Phú Trọng ta ăp rnôk, tĭng ntŭk gŭ kan hŏ dơi nchih nkah tay, ring lam, rgŏ rgum rmưn rbăn play nuih nuĭh Việt Nam:

“Neh dak he mô hŏ tă geh n’gâng kan têh kuâng săk geh têh dăng n’hanh nsing nơm dak bah dih kơt aƀaơ, geh tay âk ndơ nsan lor dơh uĕh gay nâp jâng chuat kalơ trong hăn ma Đảng he, ƀon lan he n’hanh wa hồ dêh rŏng hŏ sơch.”

Aơ lah nău lah rjăp bah Tổng Bí thư Nguyễn Phú Trọng ta Tâm nchră bôk năp Ban Chấp hành Trung ương Đảng khoá XIII n’hanh ta âk rơh tâm nchră khlay rnôk Tổng Bí thư tât râng n’hanh geh nău lah rđău đă khlay. Mô di rngơ̆ ma Tổng Bí thư hŏ lah rjăp tât nău dja rnôk ngăn an saơ, lôch bơi 40 năm ƀư rơh rgâl mhe, ntơm bah du neh dak ach o, geh drăp ndơ- kỹ thuật, buăt nthoi ntung trong wăng sa- rêh jêng kon nuĭh rluk mâl, nău gĭt blău đêt, tât aƀaơ, Việt Nam hŏ hao jêng dak dôl hun hao, rĭng geh tĭng bôk nuĭh; văn hoá, rêh jêng kon nuĭh hun hao tay, nău rêh drăp ndơ nuih n’hâm bah ƀon lan dơi rgâl geh; pah kan rdâk njêng Đảng n’hanh lam trong kan chính trị geh njuat hăn đăt ndal; tâm rnglăp lam rnoi nuĭh mô rlu dơi rdâk tay; chính trị, rêh jêng kon nuĭh đăp mpăn, njrăng n’gang neh dak- rnă njăng, đăp mpăn, ƀư tơm dơi nâp dăng; ntŭk gŭ kan têh  n’hanh nău nsing nơm bah neh dak nar lơn ma dơi n’hao prêh ta lam ntŭr neh.

Êng tâm pah kan tâm boh dak bah dih tât râng n’hanh lah ta rnôk rđău đă tâm nchră tâm boh dak bah dih lam dak Tổng Bí thư Nguyễn Phú Trọng lah rjăp mpeh nău têh jêng, hun hao bah trong tâm boh dak bah dih, tâm boh ndru “tơm nam Việt Nam: n’gu nâp, tơm wên, n’ging jôn rbăn, lăp tâm nuih n’hâm, săk rom n’hanh mpơl nuih n’hâm dăng bah rnoi nuĭh Việt Nam” n’hanh nar lơn ma dơi dak bah dih kơp dơn lam hvi:

“N’gâng kan tâm boh dak bah dih ân mpơl tay bôk rngok  gĭt blău han săk nuih  n’hâm uĕh lŏng n’hanh rom săk bah jâng nsing tâm boh dak bah dih rơh Hồ Chí Minh n’hanh nđơn tay nău way ơm tâm boh dak bah dih rôih dăng n’hanh tâm lăp nsum bah rnoi nuĭh Việt Nam, rgâl mhe tay rdâk njêng n’hanh hun hao ma jêng tâm boh dak bah dih Việt Nam blău mhe  nâp dăng  lam lĕ rngôch ndjôt săk tơm ndru nam Việt Nam.”

Ngoăy tâm  ăp nău nkah rngân tay tâm pah kan rlăch ndăng njrăng n’gang sa khâm tih djơh ntơm bah bôk năm kan khóa 11 tât aƀaơ lah pah kan rdâk njêng, rtŭt rmăn Đảng dơi ntrôl dăng tay nkre đah âk nău lah tam jru bah Tổng Bí thư Nguyễn Phú Trọng, Kruanh Ban rđău đă Trung ương mpeh njrăng n’gang sa khâm, tih djơh. Tổng Bí thư lah rjăp, đah nău njêng Ban rđău đă Trung ương (mpeh Bộ Chính trị) tât aƀaơ, pah kan rdâng lơh sa khâm tih djơh “hŏ jêng trong leo, trong rƀŏng mô dơi rlơ̆ tay”. Jêng, “Ăp nău mpơl kă rnam, nje der, rlăch dun nău rgâl mhe, “Nkhêt hâp mbung sa prăk” mô lah tĭng nău nŏng êng nơm, ŭch nde tâm uănh năl gay nduih lah nuĭh êng, ƀư tâm rkhul ndrăng nơm, lah mô di da dê”. Tĭng Tổng Bí thư, rdâk njêng, rtŭt rmăn Đảng lah nău kan rdâk njêng mpôl kan, rdâk njêng kon nuĭh, lah pah kan kon nuĭh, dŭt dơh geh gŏ tât nău lư săk, nău geh, tâm boh bah kon nuĭh. Yor kơt nê̆, ăp nuĭh he ân uănh năl êng nău tih di, rblang năl, tik luh ăp nău dơh uĕh, nău mpăng đêt rbăn lhơ bah săk he nơm; ân uănh năl, nklân na nê̆ mpeh nuĭh êng. Lah mô dâk êng, nuih n’hâm ngăn, geh nău tâm ban, tâm di ri dŭt dơh jêng tât uănh lhơ, nău way dơn saơ tât nău uĕh dơm, nău dăng bah he âk rlău nuĭh êng; tâm rnôk dơn saơ nău tih, nău rbăn lhơ bah nuĭh êng âk  rlău he:

“Gâp hŏ âk tơ̆ lah hôm, aƀaơ gâp dăn nkah tay ăp nuĭh I geh nău mĭn dja ri ân nkêh an êng du ding gay an nuĭh êng ƀư, kon nuĭh dơn rêh du tơ̆ dơm ân rêh mhâm ƀư an bah wơl wơh yor nău kan djơh khĭt đit prêng bah he, prăk kaih âk mpưm, khĭt ntŭk blău ndjôt tĭng nkre he . Nău lư săk he mơ lah nău dŭt huêng khlay.”

Tâm trong kan văn hóa rnôk nha hôm rêh, Tổng Bí thư Nguyễn Phú Trọng nkoch kloh nău kan dŭt khlay bah văn hóa lah jâng nsing nuih n’hâm, suan ntrôl hun hao bah lam rêh jêng kon nuĭh. Nơm geh du jâng văn hóa săk tơm rnoi nuĭh ƀư jâng ndăl, rnoi nuĭh he hŏ rlău dơi ăp ntil ntul rlong dŭt krit nji, mô rlu hăn tĭng n’hong hoch bah kăl e. Yor kơt nê̆, Tổng Bí thư Nguyễn Phú Trọng êng dăn đă, lam trong kan chính trị lam Đảng lam ƀon lan, lam tahen ân gĭt năl di tay nău khlay bah văn hóa yor tâm rnôk rđău kan cách mạng, Đảng Cộng sản Việt Nam n’hanh Kruanh Hồ Chí Minh way n’hao nău khlay kan bah văn hóa, way uănh văn hóa lah du trong hăn chŏl lor rlăch ndăng cách mạng, lah chông ŭnh “sol  trong an ƀon lan lam dak hăn”. Ta tâm nchră Văn hoá lam dak tâm nar 24/11/2021, Tổng Bí thư  Nguyễn Phú Trọng an tay du nău lah dŭt lăp tam:

“Bu lah măt kon nuĭh geh văn hóa, du rnăk geh văn hóa du rnoi nuĭh geh văn hóa hôm nău rêh geh văn hóa nău way geh văn hóa, trong gŭ rêh mbơh ngơi geh văn hóa … hôm ăp ntil nău djơh nău kan mphar mô dơi rlău bu ăp nău kan tih pháp luật, nău ngă ngơt lah mô geh văn hóa, lah di văn hóa lah rlơ̆ tay văn hóa, nău rhơn răm bah kon nuĭh mô di dơn ta ntŭk geh âk prăk mpưm drăp ndơ sa kah wah ngi nsoh uĕh ma hôm lah nău âk mpưm mpeh nuih n’hâm dơi rêh đah nău tâm rŏng n’hanh nuih n’hâm uĕh lŏng kon nuĭh nău leh di n’hanh tâm ban”.

Nha hôm rêh ăp rnôk ŭch ntơh nău nkoch bri nuih n’hâm he, Tổng Bí thư Nguyễn Phú Trọng way nkah tay du nău lah tâm tác phẩm dŭt ntoh lư “Loih hŏ srŏng kơt nê hôm” bah nhà văn Liên Xô Nikolai Ostrovsky:

“Ndơ dŭt khlay bah kon nuĭh lah nău rêh  n’hanh nău lư săk rêh, yor kon nuĭh dơn rêh du tơ̆ dơm. Ân rêh mhâm ƀư an bah rngot ji, wơl wơh yor ăp năm khay hŏ rêh mbro, rêh mpŭng lir; gay bah đit săk yor ăp nău kan mphar tih djơh, geh ăp nuĭh mưch rmot; gay an tât nhêp măt rok ti, he mbra n’hao êng săk an  lah: Lĕ du bông nău rêh he, lĕ rngôch n’hâm suan he, he hŏ n’groh lĕ an n’gâng kan dŭt têh khlay ta nău rêh – n’gâng kan rlăch ndăng rklaih luh rnoi nuĭh, rklaih luh kon nuĭh nsĭt tay nău rhơn mƀak an ƀon lan!”.