Bah jêh Đại hội rơh tal 13 bah Đảng, nu nău lam ntŭr neh lĕ geh âk nău rgâl ngăch, jêr jŏt, jêr njrăng, ƀư an trong kan tâm rnglăp nchră nău đah bah dih bâh Việt Nam dâk ta năp âk jêr jŏt, ntŭl rlong. Yơn lah, năm 2023, 2024 lĕ saơ âk nău ƀư tâm rnglăp nchră nău đah bah dih dŭt n’hâm âk, na nao n’hanh ntŭk ang ntoh lư bah neh dak. Nău he wơt Tổng Bí thư, Kruanh dak Trung Quốc Tập Cận Bình, Tổng thống Mỹ Joe Biden, Tổng Bí thư, Kruanh dak Lào Thoong-lun Xi-xu-lít, Kruanh Đảng Nhân dân Campuchia Hun Sen, Hun Manet, mhe aơ lah Tổng thống Nga Putin n’hanh âk kruanh neh dak khlay êng tât khâl Việt Nam; nău Việt Nam râng n’hanh nar lơ geh nău khlay tâm ăp trong ƀư âk ntil kơt ASEAN, Liên hợp quốc, Tiểu vùng Mê Công, APEC, AIPA, COP 28... dơi uănh ăp nău khlay lịch sử, rgop mĭn lah tay “Mô hŏ geh neh dak he dơi geh trong nchrŏng, nău dơi geh, nsing nơm n’hanh jâng nsan tâm rnglăp nchră nău đah bah dih kơt nar aơ”. Dơi geh lôch uĕh aơ, nĕ lah Tổng Bí thư Nguyễn Phú Trọng. Đồng chí Lê Hoài Trung, Bí thư Trung ương Đảng, Kruanh Ban Đối ngoại Trung ương năl lah:

Dơi saơ đồng chí Nguyễn Phú Trọng dŭt n’hâm uănh khlay trong kan tâm rnglăp nchră nău đah bah dih, tâm ăp nău ntoh ngơi lah rjăp đah ăp rnoi nuĭh tâm rnôk têh jêng n’hanh hun hao an mkra 2 nău tâm dak n’hanh bah dih, nkoch kloh trong kan tâm rnglăp nchră nău đah bah dih mô knŭng jŏ jong bah tâm dak ma lah nuih n’hâm têh dăng an rnôk hun hao bah neh dak. Nău tay lah nău mĭn bah Tổng Bí thư mpeh nău an m’hâm ƀư mât uănh jăp trong hăn tâm rnglăp nchră nău đah bah dih đăp mpăn, rgop rgâl êng âk trong, Việt Nam lah băl đah lĕ rngôch ăp dak, lah nuĭh dŭt n’hâm lĕ đah nău kan tâm nsum mpôl lah ntŭr neh; mât nâp nău mĭn, nău way mkra ngăch ăp nău mhe ntoh, gĭt kloh nu nău mhe, geh nu nău dŭt ngăch bah nu nău tâm dak n’hanh ta lam ntŭr neh. Lơn lah đồng chí lah rjăp, lah tih mpeh trong hăn geh jêng tât nău tih lĕ rngôch.

Tổng Bí thư Nguyễn Phú Trọng lah rjăp tâm ntil nău tâm rnglăp nchră nău đah bah dih an: “nkre nâp nâl mpeh nău way, nkre tâm di đah trong kan; djŭr rbân, ngăch blău yơn dŭt nsrôih; ngăch prăl, mĭn ƀư mhe yơn dŭt janh, nâp nâl ăp nău jêr jŏt, ntŭl rlong, yor đăp mpăn rnoi nuĭh, yor dah rŏng, uĕh lăng bah nuĭh ƀon lan; tâm rnglăp, tâm kơl yơn dŭt n’hâm, nsrôih mât njrăng nău geh bah neh dak-rnoi nuĭh”. N’hanh nău ta Rƀŭn nchră Đối ngoại lam dak 2021, Tổng Bí thư Nguyễn Phú Trọng du tơ̆ tay lah rjăp nău mĭn: “Tâm rnglăp nchră nău đah bah dih Việt Nam an ngăch prăl, nchrăp lor, mĭn ƀư mhe n’hanh djŭr rbân lơn rhŏ an hun hao wăng sa n’hanh n’hao jâng nsan neh dak”... an saơ nău uănh mĭn ma hôm nău rvê bah nuĭh kruanh gưl prêh bah neh dak đah trong kan tâm rnglăp nchră nău đah dak bah dih. Mô đêt rơh, Tổng Bí thư Nguyễn Phú Trọng lĕ ntĭnh đă: bah kơi ăp nuĭh tâm rnglăp nchră nău đah bah dih geh lam Đảng, lam ƀon lan, lam tahen. Nĕ lah tu tơm ăp Đại sứ ƀư uĕh nău kan uĕh lăng n’hanh âk nău kan: Mât njrăng nău geh neh dak, rnoi nuĭh n’hanh ntrôl dăng kan ndrel lam ntŭr neh, rhŏ an hun hao wăng sa rêh jêng neh dak.

PGS.TS Dương Văn Quảng, tă ƀư Giám đốc Học viện Ngoại giao (N’gâng kan tâm rnglăp nchră nău) an lah: lah mpeh Tổng Bí thư Nguyễn Phú Trọng lah mpeh nău uĕh bah nuĭh “trêng nchrat ŭnh”, trêng nuih n’hâm an nău kan tâm rnglăp nchră nău đah bah dih Việt Nam:

Tổng Bí thư Nguyễn Phú Trọng ăp rơh rƀŭn nchră tâm rnglăp nchră nău đah bah dih geh âk nău ntoh ngơi gay ntĭnh đă cán bộ tâm rnglăp nchră nău Việt Nam. Ăp nkô̆ nău ntĭnh ntăn lah du hê nuĭh tâm rnglăp nchră nău đah bah dih mhe mô dơi chuêl nău way ơm. Tâm rnglăp nchră đah bah dih an ntoh bah nău geh an neh dak rnoi nuĭh, nkre nuĭh rnôk aơ an geh nău blău mhe, trong mkra mhe n’hanh đă an mĭn njêng. He wât lam ntŭr neh mư dơi tâm nchră đah khân pơng nĕ lah nău ntĭnh đă bah Tổng Bí thư đah nău kan tâm rnglăp nchră nău đah bah dih Việt Nam.

Hôm Đại sứ Việt Nam ta Liên bang Nga Đặng Minh Khôi nkah tât mro nău ntĭnh bah nuĭh kruanh têh ngăn bah neh dak-nĕ lah ăp rơh nuĭh Đại sứ, Kruanh Ntoh măt ngih pah kan Việt Nam ta dak bah dih an ƀư tĭng văn hóa, nău uĕh bah nuĭh Việt. Lơn lah ăp nuĭh ƀư tâm rnglăp nchră nău đah dak bah dih hôm ntrŭt nuih n’hâm tâm rnglăp tâm kơl, gĭt n’hŭch gĭt dăng, gĭt tât rnôk dơi geh, gĭt nơm gĭt nuĭh, gĭt hao gĭt rŭch. Lĕ rngôch yor nău geh an neh dak rnoi nuĭh:

Tổng Bí thư Nguyễn Phú Trọng an lah tâm rnglăp nchră nău đah dak bah dih Việt Nam an dơi ƀư văn hóa, nău uĕh, tu tơm bah nuĭh Việt Nam. Tâm ăp ntil nu nău, nsrôih da dê, nâp nâl yơn djŭr rbân ngăch prăl kơt tơm rla, djôt nuih n’hâm n’hanh n’hâm soan rdôl hao, bôl moh nău nâp nâl mro trong hăn.

Đại sứ Trung Quốc ta Việt Nam Hùng Ba lah rjăp: Ăp năm dăch aơ, Việt Nam ƀư tĭng nău kơl “Tâm rnglăp nchră nău đah dak bah dih djŭr rbân” ngăch mpeh trong kan, tĭng nkô̆ nău nâp nâl đăp mpăn ƀư tơm, nsrôih hun hao tâm boh dăch dêh đah ăp dak ta lam ntŭr neh. Trong kan đối ngoại bah Việt Nam lĕ dơi geh âk nău khlay, kơl lor hun hao tâm boh đah ăp dak kiău ma, dak têh n’hanh ăp dak kan ndrel dăch dêh way ơm; nâp nâl tâm kơl chủ nghĩa âk ding.

Ăp ndơ dơi geh nĕ djôt nău tơm bah “nuĭh trêng nchrat ŭnh”-Tổng Bí thư Nguyễn Phú Trọng. N’hanh nău mĭn bah wa mbra lah nuih n’hâm gay tâm rnglăp nchră nău đah dak bah dih Việt Nam rlet rlău ntuh rlong, mô rŭch jâng choat ta năp nău nking n’gang jêr jŏt tâm du ntŭr neh âk nău rgâl kơt aƀaơ hin./.