Tổng Bí thư Nguyễn Phú Trọng rnê rơh tât khâl bâh Tổng thống Uganda, lah na nê̆ nău kan dŭt khlăy, pơk luh du trong hun hao mhe đah bar đảng, 2 ngih dak.

Tâm nău ueh răm, Tổng Bí thư Nguyễn Phú Trọng lah na nê̆ nău dơi tâm kơl đah bar dak ta ăp trong kan hôm nha dŭt têh, mbơh tơih ăp nău mpŏng kan têh ntrôl nău tâm kơl mpeh chính trị, wăng sa, văn hóa, n’hao nău tâm gĭt vât, tâm rgop ta ăp rơh tâm nchră lam ntur neh, lah na nê̆ nău khlăy bâh nău mĭn kan chính trị n’hanh nău ntrŭnh bâh nuĭh leo kan 2 dak tâm nău ntrôl tâm boh kan bar ding. Bar ding tâm ban ŭch nsrôih ntrôl dăng nău tâm boh kan nsum an hun hao săk rnglăy, na nê̆, ndơ̆ nău tâm boh kan jêng tât hun hao mhe an tâm di đah nău ŭch rŏng n’hanh nău dơi bâh lĕ bar dak.