Lơ 20/1, ta rơh rƀŭn, ntoh măt Rnâng kan rđau kan Trung ương Đảng gưl 13, Tổng Bí thư Tô Lâm hŏ mbơh nau tât ăp nau ntrŭnh Đại hội 14 bah Đảng Cộng sản Việt Nam. Tâm nê, nau nchrăp mbơh Chính trị rgum tâm ban 3 nau mbơh (Mbơh nau chính trị, mbơh nau văng sa-rêh jêng ndrel mbơh nau lôch nau kan ndâk njêng Đảng) njêng du nau kan rgum, ăp ntil, kloh nkô̆ nau, tơm, gleh, nơih gĭt, nơih nkah, nơih ntrŭnh. Bôk nau kan ƀư nau ntrŭnh Đại hội XIV mbơh kloh “nŭih tơm, nau kan, nŭih ƀư, nau tât” gay ntrŭnh ƀư. Tổng Bí thư mbơh kloh: nau kan, nau dăng, nau dơi, nau rnơm bah lam ntur neh bah neh geh dơi kơt nar aơ lah nau rgum, nau mbâl bah nau ơm yau rbăn năm ndâk ndrel mât neh dak; lah nau geh bah 96 năm ndâk ndrel hun hao neh dak bah nau rđau kan bah Đảng; lah nau geh bah 40 năm rgâl mhe, lah nau khĭt, chuêl săk nơm bah âk kơn tahen cách mạng.

Ăp đảng viên cộng sản, bah kônh wa ƀon lan, đồng chí hŏ nsôih n’hâm pah kan jan sa, janh tâm lơh, khĭt săk nơm. Mpeh nkô̆ nau hun hao neh dak lvang năm 2026-2030 ndrel rƀŏng tât năm 2045, Tổng Bí thư mbơh, mât ntŭk nau đăp mpăn, nâp nâl; hun hao ngăch, nâp nâl neh dak, rgâl ndrel n’hao ăp nau dơi tâm nau rêh ƀon lan; nau nchrăp ƀư nau kan, nau nsôih, nau rnơm, ƀư dơi dăng tâm rach năm mhe bah rnoi mpôl. Nsôih dơi geh hun hao GDP geh ntơm 10%/năm hao gŏ lơ; nau geh dơi bôk nŭih tât năm 2030 geh nklăp 8.500 đôla.

Gay ƀư dơi ăp nkô̆ nau, mbơh nau chính trị năl kloh 12 nau rƀŏng têh, 6 nau kan tơm ndrel 3 nau kan gay rgâl mhe. Tổng Bí thư ân lah, lăp tâm rach năm Đại hội XIV, ndŏ luh nau ân geh ƀư ân dăng, ƀư ân ngăch, ƀư ân tât dŭt tât lôch. Tâm nâm n’ha cờ bah Đảng, lam Đảng, lam ƀon lan ndrel tahen nsum n’hâm, mât nau rnơm, ƀư ueh nau blau mĭn kan, ndâk nau mpŏng ŭch, ƀư ân ăp năm, ăp khay, ăp nar jêh Đại hội hŏ geh nau dơi ngăn, geh nau rgâl ngăn, gay ƀon lan saơ, ƀon lan rnơm, ƀon lan kơl an, ƀon lan hăn ndrel ndrel lam ƀon lan geh dơi dŏng nau nê./.