Ôi 26/1, lễ wơt ngăn Tổng Bí thư, Kruanh dak Lào Thongloun Sisoulith ndrel I ur n’hanh Mpôl ntơh măt gưl têh Đảng, Ngih dak Lào dơi ƀư rgum ta Nhih pah kan Kruanh dak. Lôch rnôk wơt, Tổng Bí thư Tô Lâm n’hanh Tổng Bí thư, Kruanh dak Lào Thongloun Sisoulith leo mpôl ntơh măt gưl têh bar dak ƀư rgum nchră, tâm ôp ăp trong rƀŏng n’hanh trong nkra ƀư gay ntrŭt ntrôl tay tâm boh Việt Nam – Lào hun hao prêh mhe tâm let năp tay.

Lah ntơm pơk rơh rgum nchră, Tổng Bí thư Tô Lâm lah rjăp Đảng, Ngih dak n’hanh ƀon lan Việt Nam dŭt n’hâm rhơn, nđơr wơt Tổng Bí thư, Kruanh dak Lào ndrel I ur n’hanh Mpôl ntơh măt gưl têh khâl gưl ngih dak tât Việt Nam; lah rjăp aơ lah kruanh dak bah dih lor bôk năp khâl Việt Nam lôch Đại hội đại biểu lam dak tâl XIV bah Đảng Cộng sản Việt Nam, mpơl nău uănh khlay jru n’hanh nău rŏng mha êng bah Đảng, Ngih dak Lào tâm ban kơt săk Tổng Bí thư, Kruanh dak Lào nơm đah Việt Nam. Mpeh bah he, Tổng Bí thư, Kruanh dak Lào Thongloun Sisoulith mbah rhơn nău dơi Đại hội XIV bah Đảng Cộng sản Việt Nam, nkre mbah rhơn Tổng Bí thư Tô Lâm dơi Đại hội nsing nơm tay ƀư Tổng Bí thư Ban Chấp hành Trung ương Đảng khóa XIV.