Kêng măng 7/1, jêh rnôk râng nkah gĭt, rsơl plơng ăp Nuĭh janh dăng, nuĭh geh soan đah ƀon tơm, neh dak, Tổng Bí thư Tô Lâm lĕ pah kan đah kruanh n’gor Hưng Yên. Tổng Bí thư mbah rhơn, rnê nău nsrôih, nsrôih dŭt n’hâm n’hanh ăp săk rnglăy, nău geh ma Đảng bộ, N’gâng kan n’hanh nuĭh ƀon lan n’gor lĕ dơi geh tâm năm bah năp, lơn lah năm 2024, nta an nuih n’hâm gay n’gor Hưng Yên ndrel lam dak nâp hăn tĭng “Rach năm mhe-Rach năm hao êng săk nơm bah rnoi nuĭh Việt Nam”.

Tổng Bí thư lah rjăp, năm 2025, Đảng bộ n’gor Hưng Yên an wât di, jru lơn tay mpeh nu nău n’hanh tâm rnôk nsum; năl kloh nău geh, dơh bah n’gor gay bah nĕ n’gluh an nău rƀŏng, nău đă, săch nău kan khlay n’hanh nău rgâl mhe gay rgum ntĭm rđău, ƀĭt joet, nta an trong rgâl mhe, têh dăng lơn tâm hun hao wăng sa-rêh jêng, ndâk njêng Đảng n’hanh trong chính trị kloh uĕh nâp dăng.

N’gor ntĭm rđău, ƀĭt joet tay ƀư tĭng ndăn, dŭt n’hâm, săk rnglăy nău dăp n’gâng kan ƀĭt joet bah trong chính trị gưl n’gor, gưl nkuăl “Ngăch-dơh jêt-nâp dăng-tam-săk rnglăy”, tĭng di nău ntrŭnh, trong nchrŏng bah Trung ương, tâm di nu nău ngăn bah n’gor; uănh tât mkra prăk kơl, nău kơl, ƀư uĕh trong kan chính trị nău mĭn đah cán bộ, công chức, viên chức, nuĭh pah kan.