Măng 26/1, Tổng Bí thư Tô Lâm hŏ kuăl điện tâm nchră đah Bí thư bôk năp Đảng Cộng sản Cuba, Kruanh dak Cộng hòa Cuba Miguel Diaz-Canel. Bí thư bôk năp, Kruanh dak Cuba Miguel Diaz-Canel mbah rhơn Đảng he hŏ ƀư geh nău dơi Đại hội Đảng tâl XIV, mbah rhơn Ban Chấp hành Trung ương, Bộ Chính trị n’hanh Bí thư Tô Lâm nơm hŏ dơi Đại hội nsing nơm sơch tâm ăp ntŭk gŭ kruanh rđău kan tâm năm kan mhe. Tổng Bí thư Tô Lâm lah rjăp Đại hội tâl XIV hŏ geh nău dơi uĕh lăng, wat jêh nău kan lịch sử têh kuâng.

 Đại hội hŏ n’glôch jêh nău tĭng ƀư Nghị quyết Đại hội XIII, uănh năl 40 năm Rgâl mhe n’hanh lôch jêh tĭng ƀư Cương lĩnh, Trong nchrăp hun hao wăng sa- rêh jêng kon nuĭh têh jong, ndơ̆ luh ăp rnoh tât kan, trong rƀŏng, nău dơn kan an 5 năm tât, n’glêh an ăp nkô̆ nău têh jong đah nău rêh n’hanh têh jêng bah rnoi nuĭh Việt Nam tâm rơh hun hao mhe. Tổng Bí thư Tô Lâm lah rjăp Việt Nam dŭt n’hâm uănh khlay tâm boh tâm rnglăp mha êng, uĕh lăng đah Cuba, mbra ƀư lĕ rngôch ăp ntil ndơ I dơi gay mô rlu rdâk nâp tay nău tâm rnglăp way ơm, pơk hvi, n’hao nău tam tâm boh bar ding, yor an ma nău geh bah ƀon lan bar dak, yor bah tâm lơh tâm su, tâm boh n’hanh hun hao ta ăp nkual n’hanh lam ntŭr neh.