Ôi 7/1 ta Hà Nội, Tổng Bí thư Tô Lâm khâl n’hanh ƀư tơm rơh pah kan đah Ban Chính sách n’hanh Chiến lược Trung ương mpeh nău rdâk njêng du đêt Nghị quyết hao rblang dăn Tâm nchră Trung ương khoá 14. Ta rơh pah kan ăp nuĭh hŏ rgum tâm nchră ăp trong rƀŏng rdâk njêng 2 Nghị quyết khlay bah Trung ương nê lah Nghị quyết mpeh rgâl mhe trong ntĭt leo hun hao neh dak nsing ta khoa học công nghệ, rgâl blău ƀư mhe, rgâl mbrô n’hanh Nghị quyết mpeh ăp trong nchrăp têh jong gay ntrŭt ntrôl hun hao 2 mbrô nkre đah njêng trong ntĭt leo hun hao mhe. Aơ lah ăp nkô̆ nău têh jong, tơm khlay n’hanh jăch ndăn, ân nchrăp ơm gay an ƀư dĭl Nghị quyết Đại hội Đảng lam dak tâl 14 bơi tât.

Tổng Bí thư Tô Lâm rnê âk ăp nău dơi geh gŭ mĭn bôk năp bah Ban Chính sách n’hanh Chiến lược Trung ương lah ăp tŏng lam lĕ rngôch, nkre rƀŏng tât mpeh du đêt nău ŭch geh n’hanh nău dơn kan tâm let năp tay tâm nău rdâk njêng 2 Nghị quyết dja. Tổng Bí thư an lah, aơ lah gung trong ân tĭng ƀư gay jêng ngăn ngăn 2 rnoh tât 100 năm bah Neh dak, rdâk njêng du dak Việt Nam bah tâm lơh tâm su, đăp mpăn, geh nău tâm ban, ndrŏng dăng, uĕh jêng, srang rnglay, rhơn răm; ăp nău n’glêh an mpeh hun hao ân n’gluh tâm nkrum lam lĕ rngôch dja.