Nkah ndray 85 năm Nar Kruanh Hồ Chí Minh sĭt dak rđău đă na nê̆ Cách mạng Việt Nam (28/01/1941 – 28/01/2026), măng 28/1 ƀư pơk ƀoh rup “Bar ti rdâk njêng du dor neh dak” ta 4 ntŭk lịch sử: Cao Bằng – Hà Nội – Nghệ An – Nkual ƀon têh Hồ Chí Minh. Lah ta bôk pơk ƀoh Cao Bằng, Tổng Bí thư Tô Lâm lah rjăp, nar Wa Hồ sĭt dak mô dơn lah nar plơ̆ sĭt mpeh me neh, ma lah nău plơ̆ sĭt đah ƀon lan, đah ngăn ngăn rnoi nuĭh, đah gung trong đăp mpăn, ƀư tơm êng bah cách mạng Việt Nam.

 Ntơm bah ăp nău n’glêh an têh jong dơi njêng ntơm bah ntŭk yôk bri Cao Bằng, gung trong cách mạng Việt Nam dơi ntrŏng, jêng tât geh nău dơi bah Cách mạng Khay Pham năm 1945, ntơm njêng  luh dak Việt Nam bah ƀon lan, tă bah ƀon lan n’hanh yor an ƀon lan. Rnoh khlay dŭt têh bah nar Wa Hồ sĭt dak mô dơn gŭ ta lịch sử, ma ta ăp nău tă ơm gĭt hôm kơt ơm rnoh khlay rơh aƀaơ. Bah năp huêng bah Kruanh Hồ Chí Minh dêh rŏng, he tâm rnglăp du nuih n’hâm, rôih tĭng gung trong hŏ sơch; nđơn tay di drăp ndơ ơm yău ma Wa ntlơi an tay; dâk kan lĕ n’hâm suan, pah kan geh nău tam, ăp gưl, ăp n’gâng kan, ăp cán bộ, đảng viên n’hao nău dơn kan bah năp ƀon lan, nsrôih rdâk njêng du dak Việt Nam bah tâm lơh tâm su, đăp mpăn, ƀư tơm êng, têh dăng n’hanh hun hao uĕh, rgop an bah tâm lơh tâm su n’hanh hun hao bah nkual n’hanh lam ntŭr neh”.