Kêng măng 8/12, ta Nhih pah kan Trung ương Đảng, Tổng Bí thư Tô Lâm hŏ wơt Giám đốc Học viện Tổng thống Liên bang Nga Aleksey Komissarov dôl geh hăn khâl n’hanh pah kan ta Việt Nam. Tổng Bí thư lah rjăp, Việt Nam way uănh khlay tâm boh way ơm uĕh lăng đah Nga, tâm nê tâm boh ntĭm nti cán bộ lah n’gâng tơm khlay, rgop n’hao săk blău tơm nuĭh kan rhŏ dŏng an rơh rdâk njêng n’hanh mât njrăng neh dak tâm nô nău mhe. Tổng Bí thư rnê âk ăp bôk nău kan tâm boh đah Học viện Chính trị quốc gia Hồ Chí Minh n’hanh Học viện Hành chính Tổng thống Nga tâm bah ri aơ; nsing nơm hăn khâl n’hanh pah kan bah Mpôl mbra rgop ntrŭt ntrôl lơn đŏng tâm boh đah bar Học viện n’hanh ăp nhih pah kan dơi kan bah bar dak, nkre pơk luh âk nău mpŏng mhe tâm ntĭm nti, kơi năp nti cán bộ, gŭ mĭn khoa học n’hanh tâm boh âk ntil.

Lah rjăp Đảng n’hanh Ngih dak Việt Nam way uănh khlay nta trong dơh gay pơk hvi tâm boh đah ăp ntŭk ntĭm nti, gŭ mĭn tâm ăp trong kan công nghệ mhe, rgâl blău ƀư njêng mhe, rgâl mbrô n’hanh ăp trong kan mhe êng ƀa ƀă, Tổng Bí thư Tô Lâm dăn đă bar Học viện ntik n’hao tay nău dơi hŏ geh; pơk hvi ăp bôk nău kan tâm nkrêp ntĭm nti mpeh mât bôk kan ngih dak, lý luận chính trị, rgâl dơh glêh siƀŭt, mât bôk kan têh jong, rgâl mbrô tâm lam trong kan ngih dak n’hanh nău dơi mât bôk kan gưl têh. Nkre, ntrŭt nsôr n’hao âk tơ̆ tâm ôp tâm rgâl giảng viên, nghiên cứu sinh, nuĭh kơt nti; ƀư ăp rơh rgum nchră khoa học gay tâm pă nău tă ơm gĭt rdâk njêng Ngih dak pháp quyền, mât bôk kan têh uĕh mhe n’hanh mât uănh hun hao neh dak.