Ôi (15/11), Quốc hội lĕ mbơh an Nghị quyết rlong ƀư du đêt trong ƀư, nău kơl êng an hun hao nkual ƀon têh Buôn Ma Thuột, n’gor Dak Lak. N’gâng kan n’hanh nuĭh ƀon lan Dak Lak mpŏng kâp ăp trong ƀư, nău kơl êng aơ mbra lah nău dơi têh, ndơ ntop kơl, ntrôl n’gor ơm dơi geh nău rƀŏng jêng nklang nkual têh nkual Tây Nguyên tĭng nuih n’hâm Nghị quyết 67 bah Bộ Chính trị.

Nklang nkual ƀon têh Buôn Ma Thuột nar aơ.

Tĭng N’gâng kan Văn hóa Thể Thao Pâl nđaih Dak Lak: Nghị quyết dơi mbơh an nkre ăp nău ntrŭnh rlong ƀư du đet trong ƀư, nău kơl êng đah nkual ƀon têh Buôn Ma Thuột, n’gor Dak Lak mpeh mât uănh prăk kaih, tơm prăk ngih dak; tâm pă gưl mât uănh ngih dak tâm nău kan dăp rgum; kơl lor wăch rgum ntuh kơl; kơl an đah nuĭh way kan, nuĭh khoa học n’hanh nuĭh gĭt blău ngăn. Ndrel nar, ta rơh rƀŭn ăp rơh khay 10 bah UBND n’gor Dak Lak, wa Phạm Ngọc Nghị, Kruanh UBND n’gor lĕ đă ăp n’gâng kan nău kan, ƀon lan uănh dâl ăp trong ƀư êng mhe dơi Quốc hội mbơh an gay nkual ƀon têh ơm ƀư tĭng gưl kan, nău kan mât uănh ngih dak n’hanh n’gâng kan nkual têh, rhŏ an nuĭh ƀon lan uĕh lơn.