Mhe ƀĭt ndeh công nông rdeng ndơ tă bah mir sĭt tât ngih, wa Lương Văn Hợp tâm ƀon O Pêch, xã Ia Pếch, nkuăl Ia Grai nkoch, trong rlau 10km nthoi xã Ia Tô dôl ma jêh. Trong ƀư ngăch kơt nê, du gưl rnơm 47 rnăk pă êng neh, doh ntrơn ntŭk, tơm tăm gay ma pơk hvi trong:

            ‘Gâp pă 60 tơm cà phê, jêh nê kăl lơi đŏng, rưih lơi mpir n’gaê gay ma nkra trong ân nŭih tât rvăt ndơ tuch tăm bah nơm bu hăn, ro, ân ma kon sau nơm jêh aơ tă. Lah nsum ri gâp saơ geh săk rnglay âk ngăn”.

            Njok trong aơ ngăn lah tơm tăm jŏ nar, geh rnoh văng sa âk kơt cà phê, tơm sa play. Wa Nguyễn Trọng Túc tâm ƀon O Pếch, xã Ia Pếch, mbơh, rnôk geh jă pă êng neh, wa ndrel kônh wa hôm rve yor roh du gưl nau geh. Yơn geh nkoch trêng, bonh đă nau nkra trong yor nau geh dơi jŏ jong bah ƀon lan 2 xã, kơl an hăn ro, nchuăn rdeng ndơ nơih, ri ma rnăk khân păng ŭch đŏng:

            ‘Rnăk hên kŏ geh pă neh hvi 1,5m, jong 100m neh. Tâm neh geh du ntrong tơm bời lời ndrel 60 tơm cà phê. Êp neh rnăk hên, geh rnăk wa Nghiêm kŏ pă du ntrong tơm play đur Thái dôl ma luh play. Nŭih ƀon lan geh trong hăn ro ri rhơn ngăn”.

            Tâm xã Ia Khai, nkuăl Ia Grai, trong nthoi tât xã Ia Krái kŏ dôl geh nkra, tâm nê nŭih ƀon lan pă neh pơk hvi trong. Wa Nguyễn Mai Lương, Kruanh UBND xã Ia Khai mbơh, ntơm năm 2023 tât rnôk aơ, geh rlau 100 rnăk pă neh gay nkra bơi tât 20km trong hăn bah thôn, xã, tât mir, lŏ:

            ‘Âk rnăk ê gĭt lôch ri mơ bu hôm vĭ vĕ. Ndăn nau kan nkoch mbơh, bonh đă, đảng uỷ, UBND xã hŏ rƀŭn, jă bu ranh ƀon, Bí thư chi bộ, du đê̆ nŭih bu rnơm gay ma ndâk nkoch trêng ma ăp rnăk aơ. Ntơm nar aơ bu mô gĭt, ôi taơ hên lŏ hăn bonh đă tay đŏng”.

            Tâm nkuăl ach o n’har bri Ia Grai rnôk ƀư nau nkra trong, n’gâng kan mâp âk nau jêr mpeh tơm prăk trok tâm ntrơn ndơ. Ndri ma lam ntrong kan chính trị bonh đă, nkoch trêng, kuăl jă nau nsum ty bah ƀon lan. Ntơm bah năm 2022 tât rnôk aơ, hŏ geh ma rbăn rnăk pă neh âk rbăn mét vuông ƀư bơi tât 50km trong tâm xã Ia Pếch, Ia Yok, Ia O, Ia Krái.

            Wa Nguyễn Văn Hà, Ban Dân vận nkuăl uỷ Ia Grai mbơh, khay 10/2023, Rnâng kan rđau Đảng bộ nkuăl Ia Grai hŏ ntrŭnh nau mrô 15 mpeh n’hao nau rđau bah gưl uỷ đah nau kan nkoch trêng, bonh đă gay ma nkra trong tâm nkuăl tât năm 2030. Ntơm rnôk geh nau ntrŭnh, ăp gưl uỷ đảng, n’gâng kan, rmôt kan ăp nkuăl ndâk nau rđau đă mpeh nau bonh đă pă neh nkra trong, nkô̆ tât năm 2030 pơk hvi rlau 600km trong:

            “Nsôih tât năm 2025, lam nkuăl mra bonh đă ƀon lan pă êng neh pơk hvi trong hăn tâm xã trong tâm ƀon lan. Nkô̆ nau nsum bah nau ntrŭnh mrô 15 lah njêng nau ueh dăng ân lam ăp ntil mpeh trong hăn ƀon lan tâm nkuăl tât năm 2030 đăp mpăn nau hăn ro bah ƀon lan, pơk trong ân nau nsôih tât năm 2030 nkuăl Ia Grai geh nau dơi ƀon lan mhe”.

            Nau ntrŭnh mpeh nau bonh đă ƀon lan pă neh nkra trong tâm nkuăl Ia Grai hŏ geh nau leo lăp tâm nau ntrŭnh, ntrŭnh ƀư tâm dâng ndrel ndơn geh nau kơl an ŭch đŏng bah ƀon lan. Aơ lah nau ueh gay nkuăl n’hao nau ƀư dơi trong hăn, njêng nau dơi mpeh văng sa, rêh jêng tâm nkuăl n’har bri./.