Tâm khuh n’gôr rhơn wơt năm mhe Giáp Thìn 2024, pơh bah năp nơh, Trung ương Đoàn TNCS Hồ Chí Minh kan nsum đah Tỉnh đoàn Gia Lai n’hanh Tỉnh đoàn Kon Tum ƀư bôk nău kan “Tết tâm kơl, năm bêh nhŭk nhăk ntơr” n’hanh bôk nău kan “Năm mhe n’har bri- Tết dak lêng gôl dak”. Ăp nklâm ndơ mpơl nău rŏng, nău dơn kan bah rơh mom  ndăm đah ƀon lan, tahen ta nkual n’har bri bah lơ Tây Nguyên.

Ta xã Ia Chía, nkuâl Ia Grai, n’gor Gia Lai, Trung ương Đoàn hŏ ndơ̆ kơl 350 nklâm ndơ an ăp rnăk lah công nhân nuĭh kan mât jêr jŏt, kon se lah nuĭh rnoi mpôl đê̆ nsan hao tâm kơt nti….ăp nklâm ndơ rnoh khlay 700.000 prăk, lĕ ma prăk  n’hanh ăp ndơ dŏng sa khlay. Ma bôk nău kan “Tết tâm kơl, năm bêh nhŭk nhăk ntơr”, Trung ương Đoàn ŭch rŏng ntik uĕh tay nău way ơm rŏng nuĭh, “tâm yô̆, tâm kơl”, tâm rnglăp, tâm nkrum, tâm pă kơl bah rnoi nuĭh. Ăp gưl n’gâng kan nsrôih râng, geh âk tay nău kan geh nkô̆ khlay, ndrel hăn đah druh ndăm rchong kon se jê̆ geh nău rêh jêr jŏt, lơn lah tâm rnôk Tết Nguyên đán, rgop njêng suan ntrôl gay ăp  băl druh ndăm, đoàn viên, nuĭh kan nsrôih nsan hao tay tâm pah kan jan sa. Dơn geh nklâm ndơ ntop kơl bah bôk nău kan, nô Rơ Mah Ky, ƀon Kon Yố, xã Ia Chía, lah:

“Dŭt lah uĕh ăp nhih pah kan đơn vị hŏ uănh khlay n’hanh pă nklâm ndơ, dŭt geh nkô̆ khlay đah n’gâng kan ta ntŭk, dŭt mpŏng nău uănh khlay lơn đŏng bah ăp gưl, ăp n’gâng kan tât đah xã nkual jru, nkual ngai, nkual jêr jŏt mha êng bah nkuâl”

Nkhêp geh rnôk dja, mpôl pah kan bah Trung ương Đoàn TNCS Hồ Chí Minh ndrel Tỉnh đoàn Gia Lai hŏ  tât khâl, rgŏ jă mpôl  tahen n’har bri ta pôih n’har bri Ia Chía, n’gor Gia Lai.

Gia Lai lah ntŭk tâl 13 tâm rnoh 25 n’gor nkual ƀon têh ma bôk nău kan “Tết tâm pă tâm kơl, Năm bêh nhŭk nhăk ntơr" hăn rlău đah rlău 10.400 nklâm ndơ Tết mbra ndơ̆ kơl an ăp công nhân nuĭh kan geh tât khuch bah rơh koh n’hŭch nău kan lôch bah kơi  nuh srê, ăp ƀon lan lơh joi ka mâp âk jêr jŏt ntul rlong tă bah rgâl trôk nar n’hanh tahen n’har bri.

Tâm pơh bah năp nơh đŏng, Trung ương Đoàn TNCS Hồ Chí Minh kan nsum đah Tỉnh đoàn Kon Tum ƀư bôk nău kan “Năm mhe n’har bri- Tết dak lêng gôl dak” nkhêp geh Tết Giáp Thìn 2024 ta 2 nkuâl n’har bri Ia H’Drai n’hanh Sa Thầy.

Ta nkuâl n’har bri Ia H’Drai, n’gor Kon Tum, Ban Bí thư Trung ương Đoàn TNCS Hồ Chí Minh hŏ kơl an trong ntĭt leo wăng sa rnoh khlay 2 rmen prăk ntop kơl tơm prăk dơh thuk gay đoàn viên, druh ndăm ta ntŭk hun hao wăng sa; pă an 20 nklâm học bổng, ăp nklâm ndơ rnoh khlay 2 rkeh prăk an ăp kon se nti geh nău rêh jêr jŏt nti blău; ndơ̆ kơl 30 nklâm ndơ an công nhân Công ty TNHH MTV Cao su Chư Mo Ray n’hanh Công ty Cổ phần Cao su Sa Thầy. Nô Ngô Văn Cương, Bí thư Trung ương Đoàn, Chủ nhiệm Uỷ ban Kiểm tra Trung ương Đoàn, an gĭt:

“Ma ăp nău kan dja gay kơl an nuĭh kan, druh ndăm công nhân, nuĭh geh nău rêh jêr jŏt geh rnôk sĭt ƀon tơm sa Tết dơi răm mƀak lơn, rnăk wâl rhơn răm lơn. Lôch du nar Tết ri mbra geh ăp nuih n’hâm nsrôih nđơr lơn gay kơl nuĭh kan tâm ban kơt druh năm công nhân n’hanh druh ndăm geh nău rêh jêr jŏt pah kan uĕh lơn đŏng ri rnôk wơt du nău Tết răm mƀak”.

Ta bôk nău kan “Năm mhe n’har bri- Tết dak lêng gôl dak” nkre đah mât chăm Tết an druh ndăm công nhân, nuĭh kan dơi ƀư ta xã Mô Rai, nkuâl Sa Thầy, Ban Bí thư Trung ương Đoàn TNCS Hồ Chí Minh ndơ̆ kơl an 20 nklâm ndơ an nuĭh nsing nơm tâm ƀon lan rnoi mpôl đê̆; kơl an 2 máy vi tính, loa an Đoàn xã Mô Rai. Nkhêp geh Tết way ơm bah rnoi nuĭh, Ban Bí thư Trung ương Đoàn TNCS Hồ Chí Minh ndrel Tỉnh đoàn Kon Tum tât khâl, mbah rhơn Tết rgŏ jă nuih n’hâm an gơih nđơr, kơl an ăp nklâm ndơ geh nkô̆ khlay an cán bộ, tahen Công an xã Ia Dom n’hanh Pôih n’har bri Ia Dom, nkuâl Ia H’Drai.

Lah ta rơh hăn pah kan, Bí thư Trung ương Đoàn Ngô Văn Cương an gĭt, bôk nău  kan “Năm mhe n’har bri- Tết dak lêng gôl dak” lah nău kan way ƀư ăp năm dơi Ban Bí thư Trung ương Đoàn ƀư tâm rnôk dăch kêng Tết Nguyên đán. Bôk nău kan gay nkoch trêng, ntĭm nti, n’hao nău gĭt êng an đoàn viên, druh ndăm rchong mpeh nău khlay bah n’har bri tâm hun hao wăng sa, rêh jêng kon nuĭh, mât rnă njrăng n’har bri neh dak; ntik  n’hao  nuih n’hâm tâm yô̆, tâm kơl, mât chăm, ntop kơl đoàn viên, druh ndăm rchong kon se jê̆, nuĭh  ƀon lan geh nău rêh jêr jŏt nkhêp geh rnôk Tết Nguyên đán. Nô Ngô Văn Cương dăn đă Ban Thường vụ Tỉnh đoàn Kon Tum rđău đă ăp gưl đoàn tâm n’gor nkoch trêng tay mpeh bôk nău kan dja gay rêng lam ăp nău kan geh nkô̆ khlay tâm ăp nar kêng dŭt năm, nchrăp wơt tết.