Tổng Bí thư lah na nê̆, ƀon lan lah nău kan tơm, lah ntŭk nkan tơm, lah nkô̆ mpŏng tơm, lah nău nsrôih n’hanh lah nău kan tơm gay ma hun hao.  Ăp trong hăn, nău kơl kan an geh mpŏng tât n’hao nău rêh ndơ dong n’hanh nău mĭn bâh ƀon lan, mât đăp mpăn ƀư tơm bâh ƀon lan, ryơk, djăt n’hanh knơm ta ƀon lan. Đảng an geh dăch bên đah ƀon lan, kơl an ƀon lan, dơn geh nău uănh nđôi bâh ƀon lan, dơn nău kan ta năp ƀon lan mpeh ăp nău ntrŭnh kan bâh nơm. Văn kiện Đại hội rơh aơ lah na nê̆ nău ŭch pah kan, n’hao nău dơi kan bâh ăp gưl kan, ăp n’gâng kan, ăp nuĭh cán bộ; răng dăng rdâk nsơm nău kan ngơi âk ƀư đê̆, “ngơi ueh, kan mô ueh”, mô geh nău uănh nđôi uănh năl, ngluh mbơh nkô mpŏng kan âk yơn mbơh ƀư mbrơi, săk rnglay mô geh.

Gay ma njêng nău nsrôih jêng nău dơi kan. Tổng Bí thư đă, an geh rgum âk ta 5 rmôt nău kan , nĕ lah ƀư na nê̆ nău kan văn kiện jêng bôk nău kan ngăn, nău nchrăp đah nău kan na nê̆, nău mpŏng kan veh dơi geh, mông nar n’hanh pă nău dơn kan na nê̆, ăp nău kan an geh nuĭh dơn kan tât dŭt tât lôch. Tal 2 lah njêng nău kơl kan uănh nđôi, uănh năl ăp khay ăp rơh n’hanh ndal, răng dăng njrăng ăp nău kŏ văk mô ueh, der kan, tâm nje. Tal pe lah rgum n’hanh dŏng rnoh nuĭh kan an săk rnglăy, ƀư tĭng kan mpêt nkrem, njrăng mpŭng lir, ntuh kơl kan geh nău kan tơm, khlăy di. Tal poăn lah ƀư tĭng văn hoá ntŭk kan kloh rjăp, kan ueh di, khoa học, sŏk nău di nuih bâh ƀon lan n’hanh doanh nghiệp ƀư tơm khlăy, sŏk rnoh mbrô n’hanh nău geh ƀư ntŭk gay ma uănh năl. Tal prăm, ƀư ueh jăp nău kan mbơh tơih nău, mbơh nău mât đăp mpăn tâm di ta ntŭk rêh jêng. Tổng Bí thư lah na nê̆, rnôk geh dơn ngoăy âk mpeh nău mĭn, răng dăng tâm nău pah kan, kloh rjăp tâm nău nuĭh lah rmal tih, ƀon lan ngăn ngên lah nău tơm, Đảng he mbra rgâl nău ŭch rŏng jêng nău ngăn, ndơ̆ neh dak hun hao têh dăng, njoat nâp  nâl tĭng trong rơh mhe hun hao bâh mpôl rnoi.