Ta Rƀŭn nchră n’glôch jêh trong kan năm 2025 n’hanh mbơh ƀư nău kan năm 2026 bah UBND n’gor Dak Lak, Kruanh n’gor uănh dơn, bôl geh khuch hô bah trôk nar n’hanh ăp nău rgâl têh jêh nglăp nsum ntŭk kan hành chính, ƀon lan hôm dơi mât trong hun hao, jêng n’gâng tơm khlay gay lăp lvang rgâl mhe. Tĭng nău mbơh, năm 2025, Dak Lak geh 4 rnoh an wăng sa khlay rlău trong nchrăp, tâm nĕ dĭng lĕ geh prăk tăch n’gluh hao rlău 26% nkôp đah năm 2024; dĭng sŏk an tơm prăk geh 18.208 rmen prăk, hao 28,56%; geh prăk rĭng nuĭh nsum geh 80,6 rkeh prăk.

Đăp mpăn nău rêh jêng geh tŏng ăp đah nău jêh 100% trong nchrăp ndâk ƀư 2.800 rnăk jay thuk prăk n’hanh jut ngih rông mpông sat. Lăp năm 2026-năm pơk bôk an trong nchrăp hun hao 2026-2030, Dak Lak geh nău rƀŏng hao jêng 2 mrô; rnoh n’hŭch ach nsum lam n’gor geh bah 3%, êng nkual rnoi mpôl đêt hŭch bah 4% let lơ; ntrôl ngăch rgâl tĭng nău rhŏ-công nghiệp-ndâk njêng. N’glôn jêh rƀŭn nchră, wa Tạ Anh Tuấn, Kruanh UBND n’gor Dak Lak lah rjăp, lĕ rngôch trong n’gâng kan  an rgâl mhe nău, an rgâl mhe nău mĭn, nău ƀư dŭt n’hâm n’hanh lĕ nău kan tât lĕ nău kan  n’gluh an, nkre ntrôl ngăch pă an tơm prăk ntuh kơl nsum, hăn ndrel lĕ đah nău kan na nê̆ đah tĭng nuih tơm ntuh kơl, tĭng ntŭk n’hanh dŭt n’hâm mkra ăp nău nchrăp ƀư mbrơi.