Druh ndăm Dak Lak mbra an ƀư rdâk njêng 27km n’gâng ŭnh mpoh ang trong n’har bri ta ăp njăr trong hăn rsong uănh nkual n’har bri Dak Lak tâm năm aơ. Ăp n’gâng n’har bri dơi mpoh ang, mô dơn kơl cán bộ tahen n’har bri dơh lơn tâm rnôk rsong hăn, ma hôm lah rjăp ƀư tơm huêng khlay bah neh dak.

Bri  nsrŭp nsrŭp măng, ăp n’gâng dŏng ŭnh măt nar bah n’gâng điện mpoh ang trong n’har bri ta xã n’har bri Krông Na, nkuâl Buôn Đôn, hôm ƀoh ang êng. Đại úy Y Hán Hwing – Kruanh rmôt rgŏ jă nsum mpôl, pôih n’har bri Sêrêpôk, tahen n’har bri Dak Lak, nkoch, geh ŭnh điện sol trong hăn rsong uănh, ăp tahen lơn ma nâp jâng tâm rnôk hăn ƀư nău kan:

          "Ntơm bah rnôk n’gâng điện mpoh ang n’har bri dơi ntrŭp ta trong hăn rsong uănh n’har bri ri dŭt dơh an ăp cán bộ tahen tâm đơn vị tâm rnôk hăn rsong uănh, dơi mât  đăp mpăn. Tâl bar, ntop kơl ngăch ban saơ  ăp nuĭh geh nău mpơl lơh  n’gâng ntăm n’har bri, ntơm bah  nê dŭt dơh tâm rnôk mât njrăng n’har bri bah đơn vị".

N’gâng ŭnh mpoh angn’har bri ta njăr trong n’har bri tă bah Pôih n’har bri Sêrêpôk mât dŏng geh rnoh jong nklăp 3km, lĕ rngôch 20 n’gâng ŭnh măt nar, ntrŭp ta n’gâng ntăm n’har bri ta mbrô 45(2), du đêt n’gâng kiău ma  n’hanh ăp  njăr trong rsong hăn bah pôih n’har bri. N’gâng ŭnh tă bah Tỉnh Đoàn Dak Lak n’hanh ăp nuĭh tơm  kơl ƀư tâm khay 3 năm aơ,  nkhêp nkah ndray 65 năm nar way ơm Tahen n’har bri. 

Yuh H’Giang Niê, Bí thư Tỉnh Đoàn Dak Lak an gĭt, Pôih n’har bri Sêrêpôk lah đơn vị tâl 2 ta n’gor dơi an ƀư ta n’gâng ŭnh mpoh ang n’har bri tâm năm aơ. Aơ lah ngoăy tâm ăp 2 nău kan rgum tơm bah druh ndăm Dak  Lak an ƀư tâm năm gay tâm rlong njêng geh nău dơi mbah rhơn 120 năm njêng n’gor Dak Lak.

"Năm aơ ri mpôl hên nsrôih rdâk 27km n’gâng ŭnh mpoh ang trong n’har bri. Tât rnôk aƀaơ ri mpôl hên rgŏ jă ăp tơm  ndơ kơl  tâm n’hanh bah dih n’gor, dŭt rhơn yor dơi  râng, nău ŭch tĭng bah ăp băl đoàn viên, druh ndăm n’hanh nău ndrel hăn, ntop  kơl bah ăp doanh nghiệp, ăp n’gor băl gay mpôl  hên ƀư  jêng ngăn ngăn nghị quyết bah he. Aơ lah du ndơ ƀư gay ndrel hăn ăp tahen n’har bri, ăp n’gâng ŭnh mbra lah gor guĭh rêh ƀư tơm n’har bri bah Việt Nam".

Thượng tá Rơ Lan Ngân, Groi Chính ủy Tahen n’har bri Dak Lak uănh năl: Ăp n’gâng ŭnh mpoh ang trong n’har bri mô dơn mpơl  nău mât uănh khlay bah mpôl kan Đoàn đah mpôl tahen n’har bri ma hôm rgop kơl ntĭm nti nău way ơm cách mạng, ƀư tơm rnă njrăng n’har bri  an đoàn viên druh ndăm. Đah ăp ndơ ƀư dơi wơt dơn,  ăp đơn vị mbra way hăn nkra gay dŏng geh nău tam, jŏ jong.

"Mpôl hên dŭt rhơn n’hao êng dơi geh nău mât uănh khlay bah kruanh rđău kan ăp gưl. Tâm nê Tỉnh Đoàn Dak Lak n’hanh Tỉnh Đoàn Bình Dương hŏ kan nsum ntop kơl mpôl hên  ăp bóng đèn mpoh  ang trong n’har bri. Mpôl hên mbra dŏng ăp bóng đèn dja di nău kan n’hanh đăp mpăn mât njrăng đăp mpăn rnôk an tĭng ƀư n’hanh rgop tĭng ƀư geh nău dơi tay nău dơn kan chính trị bah ăp nhih pah kan, đơn vị jao an Tahen n’har bri n’gor, tĭng ƀư nău dơn kan tâm let năp tay".

N’gor Dak Lak geh nklăp 73km trong n’har bri, kâng n’har đah n’gor Mondulkiri, dak Campuchia. Đah n’gâng ŭnh mpoh ang trong n’har bri ta njăr trong n’har bri tă bah druh ndăm n’gor Dak Lak tĭng ƀư tâm năm aơ, nchrăp mbra mpoh ang ta ăp n’gâng ntăm n’har bri tă bah tahen n’har bri Dak Lak mât dŏng. Đah ăp  n’gâng ŭnh dơi mpoh ang, mô dơn nta trong dơh an cán bộ, tahen n’har bri  ta trong rsong hăn uănh n’har bri mât đăp mpăn rnă njrăng n’har bri, ma hôm mpoh ang ƀư  tơm ta tĭng mbal neh huêng khlay ntŭk n’har bri bah neh dak./.