VOV4.M'nông: Nthoi tay rơh hop tâl 15, ôi 15/9, Ủy ban Thường vụ Quốc hội an nău rgop mpeh nău nchrăp an rơh hop  tâl 4, Quốc hội khóa 15. Tĭng nău dăn đă, rơh hop tâl 4, Quốc hội mbra hop rgum, pah kan jŏ tâm 22 nar; hop nchrăp lor n'hanh ntơm pơk tâm nar 20/10. Rơh hop nchrăp uănh an dŏng 6 trong nchrăp luật, 1 trong nchrăp nghị quyết n'hanh an nău rgop đah 7 trong nchrăp luật. Quốc hội djăt si ƀŭt mbơh n'hanh tâm nchră mpeh Jêh geh tĭng ƀư trong nchrăp hun hao wăng sa - rêh jêng kon nuĭh n'hanh trong nchrăp sŏk dŏng prăk ngân sách ngih dak năm 2022; n'glêh an trong nchrăp hun hao wăng sa- rêh jêng kon nuĭh năm 2023, trong nchrăp sŏk dŏng prăk ngân sách ngih dak n'hanh trong tâm pă prăk ngân sách trung ương năm 2023. Mĭn uănh ăp si ƀŭt mbơh pah kan bah Chánh án Nhih phat dôih gưl têh, Viện trưởng Viện KSND gưl têh; ăp si ƀŭt mbơh bah Chính phủ mpeh pah kan njrăng, n'gang sa khâm, njrăng n'gang nuĭh tih n'hanh nău tih pháp luật, pah kan thi hành án năm 2022. Mĭn uănh si ƀŭt mbơh, uănh năl tĭng ƀư Nghị quyết mbrô 30 mpeh ăp trong kan njrăng, n'gang nuh srê COVID-19.

Nuĭh rblang: Điểu Thân