Tĭng ăp đại biểu, năm kan Đaị hội 13, Ban Chấp hành Trung ương Đảng, Bộ Chính trị, Ban Bí thư nâp nâl mro, tâm rnglăp, tâm ban ŭch, mât nâp nău way, tĭng nău mĭn, trong hăn, ntĭm rđău neh dak rlet rlău ăp jêr jŏt, ntŭl rlong, ntơm jêh ăp nău rƀŏng, nău kan Nghị quyết Đại hội 13 bah Đảng lĕ n’gluh an, tâm nĕ geh nău kan lôch uĕh ngăn ngên. Tâm nchră ta rmôt, Thủ tướng Phạm Minh Chính lah rjăp nău nti tâm rnglăp:

Nău bôk năp lah tâm rnglăp. Mô geh tâm rnglăp ri moh ndơ geh nar aơ. He nâp nâl nsrôih tâm rnglăp tâm rmôt, tâm rnglăp dak bah dih he mư geh dơi nsing nơm, mư geh nău ngơi. Nĕ lah nău dŭt tơm khlay. Rblang ta aơ mô knŭng an lam Đảng ma n’ăp ngih pah kan ntŭk kan ƀon lan lăp jru nuih n’hâm tâm rnglăp. Tâm rnglăp an tâm wât ndrel, tâm nkoch, đê̆ đŏng an nsơr soan.

Ăp nău rgop lah rjăp wât jru tay uănh rach năm mhe n’hanh nsrôih ƀư 2 nău rƀŏng 100 năm ma Nghị quyết Đại hội 13 bah Đảng lĕ mĭn lah: Nău rƀŏng ta năp năm 2030 lah nkah gĭt 100 năm ndâk njêng Đảng n’hanh jêng du dak dôl hun hao công nghiệp mhe, nău geh rĭng âk. Năm 2045, nkah gĭt 100 năm ndâk njêng neh dak, jêng dak xã hội chủ nghĩa hun hao nău geh âk. Gay dơi geh nău rƀŏng aơ, đại biểu Đỗ Tiến Sỹ, mpôl đại biểu Đảng bộ Chính phủ dăn đă: 

Ân geh hăn jru tâm nău rgâl mhe hun hao khoa học công nghệ, rgâl mĭn ƀư mhe n’hanh rgâl mhe bôk nău kan nău ƀư tĭng Nghị quyết Đại hội 14 rgâl mhe nkôp đah Đại hội bah năp, ntĭm nuĭh tơm, trong hăn ntŭk tât gay mbơh ƀư Nghị quyết Đại hội 14. Mpôl hên saơ nkô̆ nău rgâl mhe hun hao khoa học công nghệ, rgâl mĭn ƀư mhe n’hanh rgâl mrô ngih dak khuch ntrŭt tât rmôt nkra njêng, tâm boh nkra njêng n’hanh trong nkra njêng gay geh du tơm prăk mhe, hao dăng mhe tâm jâng wăng sa. Tâm lvang mhe ri an rgâl mhe hun hao khoa học công nghệ, rgâl mĭn ƀư mhe, rgâl mrô ngih dak.

Tĭng đại biểu Trần Phước Sơn, mpôl Đảng bộ TP.Đà Nẵng lĕ dơi geh ăp nău rƀŏng mpeh jâng wăng sa n’gluh tât năm 2030, uănh tât 2045 an ndâk njêng ntrong ƀư hao jêng mhe, dăp rgâl tay jâng wăng sa, ntrôl dăng công nghiệp mhe, sŏk khoa học công nghệ, rgâl mĭn ƀư mhe n’hanh rgâl mrô ƀư n’hâm soan,

Đă ƀư kloh nău way mĭn n’hanh trong ƀư bah hao jêng mhe. Aơ lah ntrong ƀư hao jêng lĕ rngôch, tâm rgop uĕh đah dĭng lĕ ntŭk tăch n’hanh dĭng lĕ nău ŭch, nsing tâm rgâl mĭn ƀư mhe, khoa học công nghệ, trong ƀư, nuĭh kan uĕh nâp âk n’hanh wăng sa mrô. Tal 2 mĭn lah 3 n’gâng tơm dăp rgâl wăng sa, nĕ lah dăp rgâl nău kan, tĭng trong công nghệp mhe, rgâl mhe uĕh nđĭr n’hanh rgâl mrô. Dăp rgâl nkual ntŭk ntô hun hao tĭng hao jêng, gung trong wăng sa n’hanh wăng sa dak lêng. Dăp rgâl trong ƀư doanh nghiệp, nuĭh kan gay n’hao săk rnglăy, geh âk n’hanh soan tâm rlong.

Ăp đại biểu uănh lah, rơh bôk năp Bôk nău kan ƀư dơi geh dâl tâm trong ƀư bah Văn kiện. Nău nĕ an saơ nsrôih dŭt n’hâm mô knŭng rlu ta trong nchrŏng, ma hôm jêng nău rêh têh dăng bah kon nuĭh. Bôk nău kan ƀư ngăn lah trong gay ƀư tĭng rgâl mpŏng ŭch hun hao. Đại biểu Phan Văn Mãi, mpôl đại biểu Đảng bộ Quốc hội dăn đă:

 Đă ndâk njêng trong hun hao nkual wăng sa khlay ngih dak, tâm nĕ rgum an 2 nkual wăng sa khlay mpeh Bắc n’hanh mpeh Nam. Yor nău geh, rmeh neh bah 2 nkual aơ dŭt têh. Rnôk wăng sa tĭng trong nău ngơi wăng sa têh ri nkual aơ dơi tâm rgop dơi geh têh ri mbra dơi mât nău khlay, nău geh. Lah kơt 2 nkual geh du trong ƀư hun hao di, tâm di ri mbra ntrôl hun hao neh dak.

Ăp nău rgop ta rmôt tâm nchră tâm ban ŭch trong tât ndâk njêng nău rêh jêng Việt Nam kloh uĕh, kỷ cương, gĭt blău, đăp mpăn n’hanh hun hao. Tâm nklang lor lah nâp nâl kỷ cương nău rêh jêng đah ryơk pháp luật, rgâl hành chính; njrăng n’gang sa khâm, sa ƀer, mpŭng lir, ƀư mô uĕh; ndâk njêng rmôt cán bộ “liêm chính, dŭt n’hâm, janh mĭn, janh ƀư, janh trok dơn lĕ đah nău kan” gay “phép nước” hăn ndrel đah “nuih n’hâm ƀon lan”.