N’gul pơh khay 6/2024, Radio nău ngơi Việt Nam hŏ nchih nkoch, pơk ƀoh 3 ntil nău nchih mpeh trong cao tốc ntêng lêng nkual ta Tây Nguyên tă bah rmôt phóng viên Nhih pah kan way gŭ ta nkual Tây Nguyên ƀư. Du rut nău nchih hŏ nchŏng luh kô̆ yơn dŭt têh tâm  hun hao wăng sa, rêh jêng kon nuĭh bah nkual aƀaơ lah ntŭk ntô ntung trong mô hŏ nâp uĕh. Nkre, nkoch nău ŭch rŏng bah n’gâng kan n’hanh ƀon lan ăp rnoi nuĭh tâm nkual mpeh nău mĭn uănh, gŭ mĭn ntuh kơl rgâl geh ntung trong, lơn lah ơm ntuh kơl ăp trong cao tốc.

N’gor Kon Tum dôl dơi uănh năl n’gor dŭt jêr jŏt nkual Tây Nguyên mpeh ntung trong. N’gor dŭt wơl geh trong cao tốc gay n’glăp dŏng ăp săk geh, dơh uĕh, lơn lah nkual pâl nđaih gưl neh dak Măng Đen. Wa Lê Ngọc Tuấn, Kruanh UBND Kon Tum an gĭt, rnôk du rut nău nchih mpeh trong cao tốc ta Tây Nguyên dơi pơk ƀoh ta ăp ndơ nkoch trêng nău lư bah VOV, kruanh n’gor Kon Tum pơk djăt da dê. Du rut nău nchih hŏ nkoch nkô̆ nău grêt dêh ngăn ngăn, nkoch di nău ŭch rŏng, mpŏng geh bah n’gâng kan n’hanh ƀon lan  ta ntŭk. Êng đah n’gor Kon Tum, nău rhơn hŏ tât ơm, rnôk  dăp rgum nkual Tây Nguyên rơh năm 2021-2030 dơi mbơh kêng dŭt khay 6 mhe aơ, trong cao tốc Quảng Ngãi- Kon Tum hŏ dơi Thủ tướng Chính phủ n’glăp tâm săk dăp rgum. Tĭng wa Lê Ngọc Tuấn, trong têh bơi pơk an Kon Tum hun hao ngăch.

“Uănh ăp nău nchih bah VOV nkoch mpeh ăp trong cao tốc ta nkual Tây Nguyên gâp saơ dŭt ngăn ngăn đah n’gâng kan ta ntŭk. Ta nkô̆ dja, mhe aơ nơh Thủ tướng Chính phủ geh lah rjăp tay đŏng, nchih nkah tay đŏng. Aƀaơ mpôl hên dŭt ŭch ơm ƀư jêng ăp trong cao tốc. Êng trong cao tốc Quảng Ngãi- Kon Tum ri 2 n’gor ndrel dăn đă Chính phủ gay joi tơm nuĭh ntuh kơl tĭng trong PPP.”    

 Wa Nguyễn Thị Thanh Lịch, Groi kruanh mât uănh UBND n’gor Gia Lai an lah, ntŭk  kô̆ yơn dŭt têh bah n’gor Gia Lai lah êng, nkual Tây Nguyên lah nsum lah ntŭk ntô ntung trong mô hŏ ăp tŏng. Ăp năm rlău aơ, n’gor hŏ dŭt nsrôih tâm nău kuăl jă, wăch rgum ăp nuĭh ntuh kơl, lơn  lah mhâm ƀư jêng ăp nhih máy nkret njêng jru an ăp ndơ geh ƀư tuch tăm, n’hao rnoh khlay ndơ tuch tăm mât rong n’hanh n’hao nău geh an nuĭh ƀon lan. Yơn lah, kô̆ yơn mpeh ntung trong hŏ “nking kol” trong ăp nuĭh ntuh kơl tât đah Gia Lai. Tĭng wa Nguyễn Thị Thanh Lịch, nău ntuh kơl ăp trong cao tốc Pleiku – Qui Nhơn n’hanh cao tốc Bắc – Nam mpeh nhâp nar geh nkô̆ hôr dŭt têh đah nău jêng, hun hao  ăp nhih máy nkret njêng têh, ăp nkual, rkŭm công nghiệp n’hanh ăp nkual tuch tăm công nghệ mhe… Ntơm bah nê, mbra nkra âk nkô̆ nău mpeh nuĭh kan, nău kan an nuĭh ƀon lan ta ntŭk. Rgâl bah hôm ma hăn tât ăp nkual ƀon têh, rgum tơm công nghiệp joi nău kan, nău geh wăng sa rgoh n’gơ, hang rbăn nuĭh ƀon lan ta ntŭk geh nău kan đăp mpăn.

“Rnôk pơk uănh âk nău nchih bah VOV ri mpôl hên dŭt rngot rhơn. Mpôl hên tâm nkoch tâm ăp group (rmôt) bah Ban chấp hành, rmôt bah ăp n’gâng kan n’gor, n’hanh ăp rmôt bah ăp nkuâl. Mpôl hên saơ lah ndrel nău lah nsum ma ăp trong nkoch trêng. N’gâng kan mpôl hên ri hŏ  dăn đă hôm yơn mpeh nkoch trêng nău lư ri rgop ntŭk nsing, geh ntŭk nsing tâm di, geh lĕ  ma tâm di nău n’hanh nău rŏng rnôk  ma ăp rgum nchră bah Trung ương ri rgop ring tam lơn gay Trung ương ntuh kơl, droh rklaih kô̆ yơn an Tây Nguyên mpeh ntŭk ntô ndơ dŏng ntung trong.”

 Nô Lý Văn Thanh, ta xã Đắk Sôr, nkuâl Krông Nô, n’gor Dak Nông an gĭt, nău ntuh kơl ntŭk ntô ndơ dŏng ntung trong aƀaơ nha hôm rbăn đêt, ăp ndơ tuch tăm, play do geh ƀư jêr tăch n’hanh khuch tât rnoh khlay. Nô Thanh an lah ngih dak ân uănh khlay lơn tât ntuh kơl an  ntung trong, lơn lah ăp trong cao tốc gay Tây Nguyên hun hao.

“Lam dak dôl khuh n’gôr ƀư trong cao tốc yơn ăp n’gor ta Tây Nguyên dôl nha hôm mpŏng kâp đŏng. Nuĭh ƀon lan Tây Nguyên moh  ndơ geh, geh neh ntu uĕh jêng, geh cà phê, sầu riêng, ăp tơm tăm rnoh khlay âk; ăp nuĭh ƀon  lan Tây Nguyên he mô djơt du ntil ndơ, mô geh trong cao tốc, mô geh ăp njăr trong rsong hăn dơh soih tâm rsong tăch rgâl dơm. Rŏ uănh âk nău nchih bah VOV nchih mpeh trong cao tốc ta Tây Nguyên gâp saơ lah dŭt di, dŭt găl. Đảng, Ngih dak ân uănh khlay lơn tât nkual jêr jŏt kơt Tây Nguyên ri mơ hun hao ngăch n’hanh nâp dăng.”.