Nar 10/10, ta nkual ƀon têh Buôn Ma Thuột n’gor Dak Lak ƀư Tâm nchră uănh năl 30 năm pah kan nkoch trêng nău ngơi rnoi mpôl đê̆ ta nkual Tây Nguyên. 30 năm aơ, ăp nuĭh ƀư báo VOV ta Tây Nguyên jêng ăp nuĭh dâk leo  lor ngăn ta trong leo nău mĭn văn hóa; ƀư jăp nău dơn kan báo chí cách mạng, lah nuĭh nkoch trêng trong nchrăp, gung trong bah Đảng, trong kơl n’hanh pháp luật bah Ngih dak.

Gĭt kloh nău khlay mha êng bah nkual neh Tây Nguyên, ntơm bah năm 1993, kruanh rđău kan Radio nău ngơi Việt Nam hŏ n’glêh an njêng Nhih pah kan way gŭ kan ta nkual Tây Nguyên gŭ ta Buôn Ma Thuột, rnôk nê lah thị xã bah n’gor Dak Lak. Aơ lah du trong nchrăp dŭt n’hâm tâm di geh trong jong, mô dơn mpơl nău lor nchrăp tâm nău pơk hvi têh kuâng bah Radio nău ngơi Việt Nam, ma hôm geh nău khlay chính trị jru hvi tâm rnôk nkual neh Tây Nguyên dôl ta trong nsan hao ndrel neh dak. Wa Lê Đình Đạo, Groi Tổng Giám đốc ơm Radio nău ngơi Việt Nam, lah Kruanh Nhih pah kan way gŭ kan ta nkual Tây Nguyên lor bôk năp, nkah tay:

“Nhih pah kan way gŭ kan bah Radio ta nkual Tây Nguyên rnôk nê nơh ri mpeh nuĭh kan geh 3, 4 cán bộ bah Hà Nội lăp dơm. Mpôl hên ân hăn ôp joi n’hanh ƀư tâm rlong sơch lăp ăp oh hŏ tốt nghiệp Đại học Tây Nguyên, n’hanh hăn tât ăp ƀon lan joi ăp oh geh nău dơi mpơl nău gĭt blău uĕh ƀư nchih rblang nău ngơi rnoi mpôl đê̆. Hôm drăp ndơ dŏng kỹ thuật, geh nău ntop kơl bah ăp nhih pah kan ta nkual thị xã Buôn Ma Thuột rnôk nê nơh, ri mpôl hên hŏ manh dơi du rot jay, mpir gạch 10 chor ntưm tôl phi brô xi măng gay nkre ƀư ntŭk gŭ n’hanh nkre ƀư ntŭk pah kan”

Nhà báo Y Khem Niê lah ngoăy tâm ăp nuĭh răk- rblang nău ngơi Rđe lor bôk năp bah Nhih pah kan Radio nău ngơi Việt Nam way gŭ kan ta nkual Tây Nguyên, 30 năm hŏ rlău yơn nău nkah mpeh ăp rơh pơk ƀoh nău ngơi lor bôk năp bah VOV Tây Nguyên nha hôm kơt ơm đŏng.

“Yor rnôk nê nơh mô geh máy tính kơt aƀaơ gay ma djăt tay. Sĭt jay ri pơk rađiô djăt tay bâr răk bah he nơm. Pơk u che, po wa, ur kon gŭ djăt. Djăr bâr he ngơi. Dŭt n’hao êng săk ngăn”.

  30 năm aơ, ăp nuĭh ƀư báo VOV ta Tây Nguyên jêng ăp nuĭh leo lor tâm trong rƀŏng nău mĭn văn hóa; ƀư jăp nău dơn kan báo chí cách mạng: lah nuĭh nkoch trêng trong nchrăp, gung trong bah Đảng, trong kơl n’hanh pháp luật bah Ngih dak. Nkoch mbơh nău lư ngăch- di, năn ngăch. Nkre rlăch dun, rơih nău tih leh, nduih lah ăp nău mplư rlăm joi trong ƀư roh đăp mpăn jêng geh tâm lơh tâm su, rgop khlay tâm nău hun hao bah nkual Tây Nguyên. Bar pe jât giải báo chí gưl neh dak tâm ăp năm rlău aơ hŏ dơi ntăm an ăp nhà báo bah VOV Tây Nguyên, lah nău uănh năl, nchih nkah di bah Đảng n’hanh Ngih dak đah ăp nău nsrôih bah rmôt cán bộ phóng viên bah Nhih pah kan way gŭ kan nkual Tây Nguyên.

Nchih nkah nău rgop bah Nhih pah kan way gŭ kan ta nkual Tây Nguyên, Đảng, Ngih dak hŏ geh âk nklâm ndơ nkhôm rnê kơt Huân chương lao động hạng ba, hạng nhì n’hanh hạng nhất tâm ăp năm 2004, 2008 n’hanh 2015; Cờ thi đua Chính phủ năm 2018. Nhà báo Vũ Hải Định, Giám đốc VOV nkual Tây Nguyên an gĭt:

“Mpôl hên uănh khlay nău rgâl mhe săk tam nkô̆ nău nchih nkoch ăp nău ngơi rnoi mpôl đê̆ tĭng trong tâm dâl nău  âk, dăch dêh đah kônh wa ƀon lan rnoi mpôl đê̆. Mpôl hên ŭanh khlay tâm du đêt ntil phóng sự, phỏng vấn, lơn lah ntil phóng sự rblang gĭt, lah jru, geh trong rƀŏng nău lư âk. Phóng viên mpôl hên mô kă rnam lăp tâm ăp nkual jru ngai nkual jêr jŏt; lơn lah tâm rnôk nuh srê Covid. Tâl bar lah mpôl hên ŭanh khlay tâm hun hao tơm nuĭh kan tŏng đah nău ŭch geh báo chí mhe. Mpôl hên uănh khlay tâm công nghệ mbrô, n’hao săk tam bah pah kan mât bôk kan tât nău blău kan báo chí bah phóng viên. Âk bôk nău kan gŭ mĭn, đề tài khoa học, nău blău rgâl mhe kỹ thuật hŏ dŏng tâm ngăn ngăn, đăp mpăn săk tam.”

Ăp rơh kơn kruanh rđău kan, nuĭh kan Nhih pah kan Radio nău ngơi Việt Nam way gŭ kan ta nkual Tây Nguyên n’hao êng săk rgop tâm njăr trong hun hao bah Tây Nguyên. Wa Đỗ Tiến Sĩ, Ủy viên Ban Chấp hành Trung ương Đảng, Tổng Giám đốc Radio nău ngơi Việt Nam an gĭt:

“Nhih pah kan way gŭ kan ta nkual Tây Nguyên mbra ntik uĕh tay nău way ơm tâm rnglăp, ngăch ngăr, blău ƀư mhe; nkre đah ngăn ngăn, nkoch mbơh nău lư năn ngăch uĕh di. Yơn nkre pơk luh ăp trong nkra mhe gay he mbra dơi mbơh gĭt lam hvi, tĭng ƀư  jăp nău dơn kan nkoch trêng, lơn lah nkoch trêng nău lư mpeh trong kơl bah Đảng, ngih dak tâm ban kơt ăp n’gor, nkual ƀon têh nkual Tây Nguyên đah ƀon lan lah nsum lơn lah ƀon lan rnoi mpôl đê̆ lah êng. Gay bah nê saơ dơi nău uănh khlay bah Đảng, ngih dak, yơn nkre saơ dơi nău nsrôih du nuih n’hâm tâm rnglăp bah rnăk wâl têh ăp rnoi nuĭh Việt Nam dơi nchih nkoch n’gôr uĕh ta nkual Tây Nguyên. N’hanh let năp tay gâp mĭn lah nhih pah kan way gŭ kan nkual Tây Nguyên mbra ntik n’hao uĕh nuih n’hâm tâm rnglăp gay n’hao dăng tâm rgâl nău way kan gay he rdâk njêng du rmôt phóng viên hŏ uĕh hôm ri ân uĕh lơn đŏng. He geh rmôt cộng tác viên tâm di gay n’hao âk lơn đŏng nău lư bah tâm dâng”.

Nkah ndray 30 năm njêng Nhih pah kan way gŭ kan ta nkual Tây Nguyên lah du jâng ntơm khlay. Bah jâng ntơm dja, nsum mpôl cán bộ, phóng viên, biên tập viên, kỹ thuật viên n’hanh nuĭh kan tâm lam nhih pah kan mbra nđơn tay ăp njuat hăn bah ăp rơh kơn yuh nô bah năp nơh gay n’glăp săk he tâm trôm jay nsum VOV ndu nău ngơi Việt Nam nar lơn ma mpăr lot ngai./.