Gay đăp mpăn nău dơi, nău geh bah nuĭh geh neh sŏk mplơ̆, đăp mpăn rgâl geh ntŭk gŭ, ntŭk rêh n’hanh joi geh trong rêh, trong nchrăp Luật neh ntu (rgâl nkra) hŏ n’glĕ dơi an nuĭh geh neh sŏk mplơ̆ dơi trok tâm ma neh geh ndrel nău ŭch dŏng đah nău ŭch sŏk mplơ̆, neh êng mô lah trok tâm ma prăk. Mpeh nkô̆ nău dja, đại biểu Đặng Đức Hiệp (n’gor Lâm Đồng) an lah, ân mĭn uănh na nê̆ nău sŏk mplơ̆ neh nkre re đah ăp ntŭk nchrăp kan geh nău khlay mha êng.

Ntĭt geh ngăn ngăn bah nău lơh joi bô-xít lam hvi ta Lâm Đồng geh tât âk rnăk ƀon lan, đại biểu nchŏng luh an lah, nău kuĭh kuai dơn geh bah lơ măt neh dơm n’hanh mplơ̆ tay neh. Lah trong trong sŏk mplơ̆ nkre re mbra jêng mpet jâk mpeh tơm prăk trok tâm, đă ntrơn du n’hanh plơ̆ ntŭk gŭ mhe. Bah ngăn geh dja, đại biểu Đặng Đức Hiệp dăn đă:

 He ân gŭ mĭn nău sŏk mplơ̆ neh geh nar ton mô lah Ngih dak manh neh bah ƀon lan gay tŏng geh ntŭk kuĭh joi tơm loih kông. Kơt nê nkre hŭch mpet jâk an tơm prăk, nkre hŭch đêt trok tâm, đă ntrơn du, ntrơn du tât ntŭk gŭ mhe, ntŭk tuch tăm mhe; hŭch đêt roh huach rnoh khlay prăk kuĭh joi gay đăp mpăn tâm rlong đah ăp ndơ geh nkret njêng jêh aơ tay. Nkô̆ nău dja ân dơi gŭ mĭn ntop tâm luật gay nta trong dŭt dơh an nău kan lơh joi loih kông n’hanh na nê̆ lah lơh joi bô xít ta Lâm Đồng.

Ndrel uănh khlay tât pah kan mât n’hanh lơh joi geh nău tam tơm neh ntu, đại biểu Bùi Xuân Thống (Nkual ƀon têh Đồng Nai) tâm ban ŭch đah nău dăn đă rgâl tâm pă ntil neh, nkre dăn đă ân ƀư kloh quy định mpeh neh si gle gay nkra bah tâm lĭn lơ rnoh nchih mbơh đah n’gâng kan neh ntu n’hanh n’gâng kan lâm nghiệp. Mpeh nău dơi n’hanh nău way bah nuĭh dŏng neh, đại biểu dăn đă kơi ntop n’glĕ nău dơi an mât njrăng nuĭh dơn tăch rgâl, dơn rgop prăk ma nău dơi dŏng neh n’hanh drăp ndơ nkre đah neh dơi dŏng di nău kan tâm năm dŏng neh hôm ƀa ƀă. Đah trong an manh neh lơh joi lŭ loih rdâk njêng nhih jay, đại biểu Bùi Xuân Thống rgop nău: 

Lôch geh ngăn ta Đồng Nai, du đêt nkual geh nău ŭch lơh joi lŭ loih ƀư ndơ rdâk njêng rhŏ dŏng an ntŭk kan rgum tơm khlay, tâm rnôk nău ngăn geh dŏng neh geh lĕ ma neh tăm tơm jong năm, neh tăm tơm ăp năm êng ƀa ƀă. Yor kơt nê, dăn đă mô dơn nglĕ an đah bri mât dŏng lah bri tăm ma gŭ mĭn quy định tĭng trong rƀŏng nkrum lam ăp ntil neh tâm di, tâm nê geh neh tăm tơm jong năm, neh tăm tơm ăp năm êng gay njêng ntŭk nsing tâm di dŏng nkhêp geh nău ntoh luh tâm ngăn ngăn.