VOV4.M’nông: Ta rơh rƀŭn tal 2, Quốc hội gưl XV mhe rlau aơ hŏ ntrŭnh mpeh âk nau kan khlay bah neh dak, tâm nê geh âk nau kan geh tât nkuăl rnoi mpôl đê̆ ndrel gôl yôk. Ăp ntoh măt Quốc hội ndrel cử tri lam dak ndrel Tây Nguyên mpŏng aơ lah Bôk nau kan leo tât nau rgâl mhe ân nau kan rnoi mpôl đê̆ lvang năm 2021-2030.

            Tâm n’gul khay 10 năm 2021 mhe rlau, Groi Thủ tướng Phạm Bình Minh kí nau ntrŭnh mrô 1719/QĐ-TTg ân ƀư Bôk nau kan bah neh dak hun hao văng sa, rêh jêng nkuăl ƀon lan rnoi mpôl đê̆ ndrel gôl yôk lvang năm 2021-2030, rơh 1: ntơm năm 2021-tât năm 2025. Ta rơh rƀŭn tal 2 (Quốc hội gưl XV) ƀư tâm khay 11/2021 mhe rlau hŏ rgum tâm nchră mpeh nau kan aơ. Âk ngăn nŭih ntoh măt Quốc hội ntoh nau ŭch Chính phủ rđau ăp n’gâng kan, ntŭk kan ơm ntrŭnh ăp nau kan hành chính geh tât, kơp ntơm bah nê, ăp n’gor geh nau nchrăp kan n’hêl tâm nau ƀư, pơk trong nơih gay ma kơl an nŭih rnoi mpôl đê̆ nkuăl jru, nkuăl ngai. Aơ kŏ lah nau ŭch bah cử tri ndrel ăp n’gor mpeh yôk. Wa Y Thi Niê-Groi Kruanh jrâu kan rnoi mpôl nkuăl Krông Pắk, n’gor Dak Lak, ngơi:

            ‘Chính phủ, Quốc hội hŏ ntrŭnh âk bôk nau kan hun hao nkuăl rnoi mpôl đê̆- gol yôk. Nkuăl Krông Pắk kŏ đă n’gor, Trung ương uănh kơl an, pơk trong nơih gay ma n’hao nau nkra ăp trong hăn tâm nkuăl, ndâk trong hoch dak, neh tuch tăm, ndâk ăp nau kan công nghiệp, pă kan pah mô lah nti kan pah ân kônh wa ta aơ gay ma ân rnoi Rđe ndrel ma kônh wa rnoi mpôl đê̆ êng êng geh kan pah, geh prăk ƀư nau kan ân nau rêh”.

            Dŭt khay 11/2021, UBND n’gor Dak Lak hŏ ntrŭnh nau nchrăp mpeh hun hao văng s,a rêh jêng nkuăl rnoi mpôl đê̆ ndrel gôl yôk lvang năm 2021-2030. Tĭng nê, UBND n’gor Dak Lak đă ăp n’gâng kan, ntŭk kan, nkuăl rgum ƀư ân tâm ban, geh săk tam bah Bôk nau kan neh dak hun hao văng sa, rêh jêng nkuăl rnoi mpôl đê̆ ndrle gôl yôk lvang năm 2021-2030, mô nsrŭng nau n’hao nau rêh drăp ndơ, nuih n’hâm bah nŭih rnoi mpôl đê̆. Uănh tât nau kan aơ, wa Y Lươm Knul, Groi kruanh UBND xã Krông Na, nkuăl Buôn Đôn, ntoh nau:

            “Nau đă bah Quốc hội lăp tâm nau rêh ân nŭih rnoi mpôl đê̆ tâm nkuăl aơ, nkre hun hao nau kan pâl n’aih tâm nkuăl aơ, tĭng gâp ŭch mhâm ƀư ân geh nau kơl an, kơt lah ân hun hao pâl n'’ih nsum mpôl- Home Stay, mât nau ueh nau vay ơm gay ma kơl an bu năch, mbơh ăp ntil ndơ pâl n'’ih bah kônh wa nơm geh njêng. Ân geh nau nkoch trêng, ntĭm mbơh ân nŭih rnoi mpôl đê̆ gay ma n'’ao nau gĭt mpeh nau kan pâl n'’ih mhâm ƀư ân geh prăk"”.

            Tâm Dak Nông, ntŭk geh rlau 40 rnoi oh nô rêh nsum, rnoh ach o lah nŭih rnoi mpôl đê̆ hôm âk rlau n’gul rđil rnoh ach o nsum bah lam n’gor. Gay dơi ƀư bôk nau kan bah neh dak hun hao văng sa, rêh jêng nkuăl rnoi mpôl đê̆, gôl yôk n’gor Dak Nông lvang năm 2021-2025, n’gor đă Trung ương pă rlau 3.511 rmen, tâm nê, tơm prăk Trung ương kơl an rlau 2.600 rmen, hôm e lah tơm prăk n’gor ndrel tơm prăk rgum. N’gor đă n’hao tơm prăk ân nau kan rgum dăp ƀon lan ndrel nau kan hun hao nau kan tuch tăm, tăm bri geh nsum ma mât njrăng bri ndrel nau n’hao nau geh ân ƀon lan. Wa Thị Djong (rnoi Bunong) cử tri ƀon Srêl, xã Dak Ru, nkuăl Dak Rlâp, n’gor Dak Nông mbơh, rnôk aơ kônh wa geh neh, yơn mô tŏng prăk ntuh kơl, mô geh nau gĭt mpeh nau kan khoa học mhe, ri ma Ngih dak ân geh ntuh kơl nau kan aơ:

            ‘Bôk năp neh ntui ri nơm hŏ geh bah ơm, nơm geh n’hâm. Yơn ân geh phân poh, ndrel tơm prăk gay ƀư nau kan văng sa. Lah geh prăk ri mhâm ƀư ân păng geh săk tam văng sa. Tơm prăk ri ân geh ngân hàng kơl an ntuh kơl ân kônh wa manh. Mpeh kon ntil ri ân geh rmôt pah kan lŏ mir kơl an. Lah dơi geh kơt nê ri gâp rhơn ngăn, lah ueh âk ngăn”.

            Mpeh ntrong ƀư nau kan, Dak Nông mra rgum rklaih ăp nau kan mpeh nau pă neh tuch tăm, rgum jut lơi ngih truh sat, đăp mpăn nau rêh ân ƀon lan ntrơn gŭ hăn mô geh nchrăp, n’hao nau ntuh kơl ngih vâl dŏng nau kan tuch tăm, nau rêh bah kônh wa, hun hao ăp nau kan tuch tăm, tăm bri tâm rgop nsum ma nau vay ơm, gay kônh wa rgâl dơi nau geh jêng, n’hao nau rêh, n’hao ăp bôk nau nti nau kan, mât chăm mpeh dak si kŏ kơt lah kơl an mpeh nau ntĭm nti ân kônh wa, ăp oh kon ăp nroi mpôl đê̆. Ntơm bah nau aơ, wa Điểu Minh-Bí thư Chi bôk ƀon Bu Bir, xã Quảng Tín, nkuăl Dak Rlâp, ngơi:

            “Mpeh nau kan gưl ba lơ ri ân geh ntĭm rđau, tal bôk năp mpeh nau blau nau kan ân kônh wa. Kônh wa geh nau dơi blau ƀư mir. Đah kônh wa ê geh nau blau ri nơm ân geh ƀa ƀơ hăn ntĭm nti mro âk kônh wa. Đah nŭih ƀon lan geh mir tơm tăm mô dơi lơi, tăm cà phê, tăm điều mô lăng jêng ri geh nŭih bu mô blau mât chăm, mô geh put ma dak si poh phân ri tơm mô geh hun hao ôh”.

            Tâm rnôk bôk nau kan bah neh dak hun hao văng s,a rêh jêng nkuăl rnoi mpôl đê̆, gôl yôk n’gor Dak Nông lvang năm 2021-2025, n’gor Dak Nông ndơ̆ lih du đê̆ nkô̆ nau ngăn tât năm 2025 kơt lah nau geh bah du hê bôk năp rnoi mpôl đê̆ 1,5 tơ̆ rđil năm 2020, rnoh rnăk ach o rnoi mpôl đê̆ n’huch ntơm 3% hao gŏ lơ/năm, rklaih pă 90% nau geh dơi bah neh gŭ, neh tuch tăm, rlau 95% kônh wa rnoi mpôl đê̆ geh dŏng dak dŏng kloh ueh./.

Nŭih rblang: H’Thi