VOV4. M’nông: Ƀon lan Rđe mô lah Bunong ta n'gor Dak Nông gŭch ka rnăng ndrel đah ăp  lha gir rsâm boh mbrăch nklâm sa đah lha bri ƀư ka rnăng gŭch lơn ma kah êng n'hanh ƀư nkơnh rŏng sa âk...

Ăp mblâm ka rnăng nhŭp joi ta dak me sĭt rao kloh, roch jănh proch khŭng. Ka rao pot đah boh mô lah du mbăt ŭnh buh rcha lam săk ka gay lơh kloh ntô mƀĭr bah lơ. Gay mô ƀư ƀô chrĭ, ân rao kloh mham ka ta trôm ndŭl n'hanh 2 rtuăl mham bah meng nke ka. Bu sŏk pêh rek nsuet ta săk ka gay rnôk gŭch boh mbrăch lăp tâm puăch ka tâm ban kơt duh ngăch đŏng, lăp tâm ban n'hanh tâm trôm sơh kro lơn. Lôch rnôk roch khŭng proch, ka an luh sơh dak, lôch nê pot boh mbrăch gir rsâm.

Ka rnăng gŭch tĭng trong bah nuĭh rnoi mpôl đê̆ ƀon tơm ta n'gor lah nău nkre lăp nsum uĕh mha êng đah ka rnăng n'hanh ăp ntil gir rsâm boh mbrăch ƀô kah ƀhĭng. Nê lah lha cha yong, mblăng, lah play rmuăn...tê̆ tâm mpăl juh du đêt boh, bột ngọt, mbrăch, jiăm tăp ndrel đah lha cha yong, lha rmuăn bri, mblăng hŏ siăt rhên. Rnôk pot, nuĭh ƀon lan rsâl tê̆ ndơ juh nê tâm ndŭl ka n'hanh ăp trong rek wăr săk ka. An jŏ nklăp 15 mnĭt an boh mbrăch lăp lam, nuĭh ƀon lan sŏk rse tôk jê̆ kôih mplônh sôr bah bôk tât bŭt ka.

Ka gŭch ta ŭnh n'hâng hŏ ơm nchrăp lor. Tâm rnôk gŭch ka ân ndăch ka an păng sĭn tâm ban, gŭch jŏ nklăp tâm 30 mnĭt n'hanh uănh tĭng têh jê̆ ka. Rnôk saơ ka ntơm geh ƀô kah n'hôl lam, gir rsâm bah lơ ntô bơi sĭn êr n'hanh ka mô hôm luh dak đŏng lah ka hŏ sĭn hôm.

Puăch ka hŏ sơh kro n'hanh păt tay n'hôl luh ƀô kah ƀhĭng kah uĕh ngăn. Ndơ sa ka rnăng gŭch dơi sa nklâm nkre đah ăp ntil lha si tâm bri kơt lha lốt, lha sung, lha đinh lăng, lha rmuăn nse, lha play wai nse...ăp ntil lha dja nkre tâm ban kơt du ntil biăp sa hôm lah lha dak si uĕh an n'hâm suan đah ƀon lan ta aơ đŏng; plôk mblăy ka rnăng gŭch, nklâm đah lha si bri, he mbra lĭp đah du đêt boh mbrăch mblăng juh an ƀô kah dŭt n'hâm êng, kah mô hôm jêng nkoch.

Puăch ka rnăng pru mô geh sơh kro, dak njŭng êng bah săk ka lơn ma ntop ƀô kah tay yor ăp ntil lha gir rsâm boh mbrăch lơn ma njŭng trĭt, sa mbro mô dơi dĭl./.

Nuĭh rblang: Điểu Thân