Jêh bơi tât du khay mât chăm ur nơm deh kon tâm ngih dak si Đại học Y Dược Buôn Ma Thuột, nô Lang Văn Đại tâm xã Ea Kiết, nkuăl Cư Mgar ƀư săm ƀŭt hăn sĭt tâm nau rhơn ngăn. Yuh Lương Thị Nga, ur nô Đại deh kon rnôk dôl bŭn 30 pơh. Kon se mô dăng sŏ n’hâm, nhiễm trùng sơ sinh ndrel krâl mham, ƀư rnăk vâl rvê ngăn. Rnơm nau kơl an bah ăp nau dak si ma kon se hŏ rlet bah nau khuch ndrel geh sĭt tâm ngih:

            ‘Rnôk nê kŏ rvê ngăn yor mhe geh 7 khay dơm, bôk năp lah deh kon nơm păng mô dăng kơt kon se êng, jêh ri lŏ mô tŏng khay đŏng ri rvê, yơn rnôk aơ kon gâp kơt aơ ri rnăk hên đăp mpăn hôm. Gâp rnôk aơ rhơn ngăn yor kon gâp ueh lăng, n’hâm soan ngăch, lah ueh ma nai dak si âk ngăn, mô blau nau ma ngơi ôh, rhơn ngăn”.

            Tĭng nai dak si Võ Minh Thành, Giám đốc Ngih dak si Y Dược Buôn Ma Thuột, bol ma mhe lăp kan ntơm khay 2 năm 2022, ngih dak si hŏ ndjôt ndul 4.035 kon se mhe deh, tâm nê geh 381 kon se rnom ma thụ tinh tâm dĭng nghiệm (IVF). Rnơm ntuh kơl ndơ ueh mhe ndrel săch nai dak si blau ntơm bôk năp, tât rnôk aơ hŏ dơi 32 rbăn tŏ rek, săm bơi tât 54000 nŭih gŭ bĭch ndrel khám ân 851 rbăn tŏ nŭih.

            Nai dak si Võ Minh Thành mbơh, gay tŏng dơi nau ŭch khám, săm ji bah nŭih ƀon lan ndrel pơk hvi nau hao 700 nsưng săm ngih dak Đại học Y Dược Buôn Ma Thuột uănh nau ntuh kơl mĭn njêng khoa học, n’hao nau blau bah nai dak si lah ngoai tâm ăp nau kan tơm khlay:

            ‘Phung hên hŏ đă cán bộ tât ăp ngih dak si têh, ăp ngih săm ƀŭt Đại học têh tâm dak ndrel dak ba dih, ntĭm nti gleh, jong. Rnơm nau nê păng rgop nau ân ăp nau blau năl ndrel săm bah Ngih dak si mô rluh rgâl mhe, n’hao prêh ndrel geh dơi ăp nau blau bah ăp nkuăl ƀon têh têh bah lam dak”.

            Êp ngih dak si Dại học Y dược Buôn Ma Thuột, Dak Lak hôm geh ngih dak si Đa khoa Thiện Hạnh ơm ngăn tâm Tây Nguyên. Lôch 20 năm pah kan, Ngih dak si Đa khoa Thiện Hạnh hŏ ntơm geh 100 nsưng săm, hao jêng 660 nsưng săm, rlau 300 nai dak si geh nau blau Chuyên khoa ndrel Thạc sĩ, ntrŭnh âk nau blau săm jru, kơl an n’huch nŭih ji hăn ngai, kơt rek môr tâm rngok, rek nting kuih, rgâl khớp...Ngăn lah ntŭk kan sản khoa, ngih dak si aơ hŏ dơi ƀư âk tŏ rel sŏk kon tâm ndul ân nŭih me geh nau ji.

            Tĭng nai dak si Phạm Trọng Nhơn, Groi Giám đốc Ngih dak si Đa khoa Thiện Hạnh, ngih dak si hŏ khám ndrel săm ân nklăp 1.500 nŭih tâm ăp nar tâm 5 năm ma aơ, đah 550 nŭih gŭ bĭch. Nau aơ ân saơ nau kơl an hun hao nau kan dak di pơk êng tâm Dak Lak hŏ leo tât nau dơi ueh:

            ‘Gâp nsing tâm nau ŭch khám săm ji bah ƀon lan ndrel tâm 20 năm ngih dak si hŏ geh ƀư dơi nau kan bah ăp ntŭk khám săm ji mro leo tât nau ueh tâm nuih n’hâm ƀon lan nŭih ji tât khám ndrel săm tâm ngih dak si Thiện Hạnh lơn ma âk ri ngăn lah nau rƀŏng bah rđau kan ngih dak si kŏ kơt nơm geh dơi nau kâp rnơm bah kônh wa ueh ngăn”.

            Wa Nay Phi La, Giám đốc Sở y tế n’gor Dak Lak mbơh, n’gor rnôk aơ geh 5 ngih dak si pơk êng ndrel ăp jrâu khám đa khoa tâm ăp nkuăl, nkuăl têh tâm n’gor. Leo nau dơi ƀư tơm bah ntrong kan dak si ndâk êng, ngih dak hŏ kơl n’huch ân ngih dak si ndâk nsum bah ngih dak ndrel tŏng nau ŭch khám săm ji ân ƀon lan đah prăk dŏng tâm di:

            ‘Nau hun hao bah ngih dak si êng tâm nkuăl hŏ leo tât ân âk nŭih ji âk nau săch tâm nau khám săm ji. Ntŭk kan lŏ bonh đă kŏ kơt lah râng tâm mbơh nchră nau ân UBND n’gor kŏ kơt lah N’gâng kan dak si gay pă săm ƀŭt dơi kan. Tâm nau mât ndâk du nau kan tâm rgop ƀư gay mhâm ân rnôk geh nau ŭch kơl an nŭih ji mô lah rnôk geh nau ŭch ri ân geh rgop ri mô geh tâm nkhah ma ăp ngih dak si nsum êng”.

            Dak si pơk êng tâm Dak Lak dôl nar ma ƀư nâp nau dơi khlay tâm nau pă nau nâp nau mât chăm n’hâm soan ƀon lan. Nau hun hao bah ăp ngih dak si pơk êng mô knŭng kơl ntŭk kan n’huch nau jâk ân ăp ngih dak si nsum ma hôm leo tât nau săch âk ntil, tŏng dơi nau ŭch khám săm ji. Tă bah nê, rgop nau khlay tâm nau hun hao nsum bah ntŭk kan dak si Dak Lak./.