Ăp nar aơ, ta Tanh ndeh păr quốc tế Cam Ranh, trong kan uănh nđôi srê dak si dơi rhăt jăp. 7 măy vĕ duh săk bah ngai dơi nglăp ta nkual lăp gŭ. Rmôt kan dak si n’hao kâp măng nar, đăp mpăn uănh nđôi rjăp lĕ rngôch bu năch. Tâm ban nĕ, ăp bảng mbơh njrăng n’gang srê dơi pă ta âk ntŭk dơh uănh nđôi, ntĭm năch nchrăp uănh nđôi săk soan n’hanh tâm rgop đah nuĭh kan dak si geh nău ntoh ndal. Tât aƀaơ, hang rbăn nuĭh năch lăp gŭ lĕ dơi uănh năl srê n’hanh mbơh dak si tĭng nău ntrŭnh.

Wa Lê Văn Tùng, Giám đốc Ntŭk kan uănh nđôi srê dak si lam ntŭr neh n’gor Khánh Hòa an gĭt:

Bu năch rnôk tât đah tach ndeh par quốc tế Cam Ranh ri 100% an rlău măy vĕ duh săk luh êng. Đah nuĭh geh ntôn hăn bah nkual srê mô lah ntôn ntưp kaman Nipah, cán bộ uănh nđôi srê mbra ndơ̆ bu năch lăp nkhah êng, mbơh tơih nu nău srê. Nuĭh khlay mbra mbơh an ăp ngih pah kan mât uănh ngih gay ndơ̆ bu năch tât ngih dak si êp ngăn uănh nđôi, sŏk mham xét nhiệm.

Mô knŭng ta mpông n’har bri, trong kan groi nđôi nuh srê dơi n’hao ta lam n’gor. Ntŭk uănh nđôi kop ji Khánh Hòa uănh nđôi nu nău nuh srê tâm n’hanh bah dih dak, ntrôl dăng groi nđôi ta ntŭk gŭ rêh n’hanh ăp ntŭk ngih dak si, ngăch saơ, uănh nđôi n’hanh mkra ăp nuĭh ntôn. Tâm rnôk nĕ, nău kan dak si n’gor mĭn uănh nđôi tă bah mpông n’har bri n’hanh ntŭk gŭ rêh lah trong njrăng n’gang khlay ngăn, gay saơ ơm ăp nuĭh ntô tă bah bôk năp dâl. Nai dak si Huỳnh Trọng Tân, Kruanh khoa jrô kan njrăng n’gang ji tâm ntưp, Ntŭk uănh nđôi kop ji n’gor Khánh Hòa an gĭt:

Tĭng nuih n’hâm uănh nđôi uĕh mpông n’har bri n’hanh ntŭk gŭ rêh tĭng ntĭm rđău bah Cục n’hanh N’gâng kan Dak si, aƀaơ mô hŏ djôt dơn nuĭh ji yơn mpôl hên hôm e nchrăp ăp nkual sŏk dŏng kơt rnôk Covid-19, nkre tâm rgop ăp ntŭk kan gay ntop tay ndeh rklư ntop kơl săm rnôk khlay.

Ji yor kaman Nipah lah ji tâm ntưp rmôt A, dơi ntưp bah mpa rong tât nuĭh n’hanh bah nuĭh tât nuĭh, đah rnoh khĭt kơp êng bah 40 tât 70%. Aƀaơ mô hŏ geh vaccine n’hanh dak si săm tam. Tâm rnôk Ấn Độ djôt dơn ăp nuĭh ntôn ntưp, geh srê lăp hôm e geh. Ta năp nău ngăn nĕ, nău kan dak si Khánh Hòa mât tay nău nchrăp âk, ntrŭt đă nuĭh ƀon lan n’hao njrăng n’gang, nchrăp ƀư tĭng ăp trong njrăng n’gang ji êng nuĭh, tâm rgop rjăp đah ngih pah kan gay mât njrăng đăp mpăn săk soan an nơm n’hanh nsum mpôl. Ta trong săm, uănh nklang rnôk aơ đăp mpăn trong nkhah mpôn êng n’hanh đăp mpăn an n’ăp nuĭh ji n’hanh nuĭh kan dak si. Ta ngih dak si Bệnh Nhiệt đới Khánh Hòa, nkual nkhah êng dơi pă ntŭk êng, trong hăn nkhah êng, tŏng ăp dak si, nuĭh kan n’hanh năp ndoh ndơ n’gut n’gang.

Nai dak si Lý Thế Huy, Groi Giám đốc mât uănh Ngih dak si Bệnh Nhiệt đới n’gor Khánh Hòa an gĭt:

Ngih dak si lĕ nchrăp nuĭh kan, đăp mpăn nkual săm nkhah êng, tâm pă trong hăn, tŏng ăp dak si, nuĭh kan n’hanh năp ndoh ndơ n’gut n’gang gay rhŏ an trong kan nchrăp n’gang kơt săm rnôk geh tât nu nău.