Yuh Nguyễn Khánh Phương, ta phường Tuy Hòa an gĭt, rơh Tết năm 2023, nuĭh rnăk wâl bah yuh geh nău njê yor deh nse mô uĕh, an ntop mham âk mư dơi bah. Dôl rwê lơn, nuĭh ji geh mham AB jêng nău joi mham rnôk nĕ dŭt jêr jŏt. Tâm nău ach o, ăp đơn vị mham yor ngih dak dak si Đa khoa Phú Yên wơt dơn bah nuih kơl kan ndrel rmôt lĕ ngăch kơl rêh nuĭh rnăk wâl yuh. Bah nĕ, rnôk săk soan dơi geh, gĭt ntŭk ŭch mham yuh Phương lŏ tât yŭr an.

Yŭr an mham bah năp Tết Bính Ngọ aơ lah rơh tal 4 tâm 3 năm bah năp yuh râng ta phường Tuy An. Yuh Nguyễn Thị Khánh Phương nkoch:

Kơp bah rnôk yuh bu ur gâp geh ji hôm dơi yŭr an mham săm ndal bah, 3 năm bah năp n’hâm soan ngăch gâp bah gâp râng yŭr mham. Gâp mpŏng, ăp dak mham bah gâp mbra kơl rêh ăp nuĭh ji mbăn êng kơt nuĭh jay gâp tă mâp.

Râng yŭr an mham ta phường Tuy An tâm rơh aơ, jêh rnôk rƀŏng tĭng nău rgŏ jă bah Ngih dak si Đa khoa Phú Yên, yuh Đinh Thị Ngọc Ngàn, phường Tuy Hoà, nkoch:

Aơ lah rơh tal 4 gâp râng yŭr mham, đah mpŏng ŭch dơi tâm pă, ntop kơl ăp nuĭh ji dôl mâp jêr jŏt đah mham. Tă bah ntrong leo aơ, gâp mpŏng mbrqa geh tay âk băl mom, ăp oh yuh rlău năm râng yŭr an mham kơl nuĭh âk lơn, rgop rêng hvi nuih n’hâm tâm pă an nsum mpôl.

Bah bôk khay 1 tât aƀaơ, Ngih dak si Đa khoa Phú Yên lĕ wơt dơn nklăp 330 đơn vị mham bah ăp ntŭk yŭr an mham ta phường Tuy An, n’hao rnoh mham ntêm nkrem hao bơi 760 đơn vị. Tĭng nai dak si Nguyễn Định Huy, Kruanh khoa Huyết học-Truyền máu, Ngih dak si Đa Khoa Phú Yên, du khay ăp ngih dak si nkual mpeh bah lơ n’gor Dak Lak ŭch nklăp 600 đơn vị mham. Tâm rơh Tết, rnôk rnoh nuĭh săm ndal, prah tâm tom ndeh geh hao, nău nchrăp rgum sŏk mham bah ơm lah trong mkra khlay gay tŏng ăp mham rhŏ an săm nuĭh ji tâm rơh Tết Bính Ngọ.

Aƀaơ du pơh mpôl hên wơt dơn rlău 150 đơn vị bah ăp bôk nău kan yŭr mham yor Mpôl rgŏ jă yŭr mham ŭch êng kuăl jă. Jêh rnôk wơt dơn mham, rnoh mham aơ dơi săch na nê̆ n’hanh tâm pă tĭng 5 rmôt ji bah N’gâng kan dak si kơt: HIV, viêm gan B, C, giang mai, duh rtoh luh mham rih nchrăp rhŏ an trong kan săm ngăch, săm an nuĭh ji tâm rơh Tết.

Ndrel đah nkual mpeh bah lơ, ntrong leo yŭr an mham rơh bah năp Tết Bính Ngọ ƀư n’gŭr răm ta mpeh bah lơ n’gor Dak Lak. Nai dak si chuyên khoa 2 Trịnh Hồng Nhựt, Giám đốc Ngih dak si Đà Khoa nkual Tây Nguyên mbơh, đah âk 1.200 nsưng ji, ăp rơh Tết ngih dak wơt dơn âk nuĭh ji. Gay đăp mpăn trong kan but uănh, săm ji ngăch, săk rnglăy, ngih dak si lĕ nchrăp lor tŏng ăp dak si, ndoh ndơ dak si, pă an 100% y nai dak si n’hanh nuĭh pah kan kâp Tết.

Tĭng nai dak si Trịnh Hồng Nhựt, bôl tơm mham tâm rơh rlu Tết jong nar ntŭl rlong mro, knơm nchrăp bah ơm, tât aƀaơ ngih dak si hôm e wơt dơn tay n’hanh ntêm nkrem hang rhiăng đơn vị mham, nchrăp rhŏ an trong kan săm ngăch, săm ngăn.

Mpeh dak si, ngih dak si lĕ đă Khoa Dược ndâk njêng trong nchrăp, nchrăp tŏng ăp dak si, ndoh ndơ dak si rhŏ an trong kan but uănh, săm ji tâm rơh Tết. Đah tu tơm mham, ngih dak si tâm rgop đah ăp rmôt kan lŏng bôk tor rgŏ jă 1.000 đơn vị mham ntêm nkrem rhŏ an săm ngăch nuĭh ji. Hôm rnoh aơ âk lơn ăp năm knŭng ta rnoh 700-800 đơn vị mham, nchrăp rhŏ an săm ngăch, săm ngăn. Êng đah ăp rmôt mham khlay, ngih dak si lĕ tâm ôp lor đah ăp nuĭh kơl an nchrăp yŭr mham rnôk ngih dak si ŭch.

Đah nău nchrăp lor bah nău kan dak si ndrel nuih n’hâm mbra nkoch bah ăp nuĭh kơl kan yŭr an mham, ăp ngih dak si ta Dak Lak dôl nchrăp tŏng nău ŭch săm ngăch, săm ngăch rơh Tết Bính Ngọ. Ăp đơn vị mham dơi ntêm nkrem ngăch lah ntŭk nsing khlay gay ntêm an nău rêh an nuĭh ji. Tă bah nĕ, rgop đăp mpăn săk soan Nuĭh ƀon lan, gay ăp nuĭh wơt Tết đăp mpăn, tŏng ăp.