Nau ngăn lah, knŭng tâm pơh rlau aơ, rnoh nŭih ntưp srê hŏ hao tât rlau 210 nŭih geh lăp tâm ngih dak si gay ma săm. Srê rtoh luh hô ngăn tâm Phường Tuy Hoà, ndrel ăp xã Phú Hoà, Đồng Xuân, Sông Hinh, Krông Ana, Ea Súp, Ea Hleo bah n’gor Dak Lak. Nau kan rdâng srê ji, mât n’hâm soan ân kônh wa ƀon lan rnôk aơ dôl lah nau kan ndal ngăn, mô dơi ƀư thơ tha, mô njrăng.

Nkô̆ nau leo tât nau kan geh srê hao dăng âk tâm ăp xã, phường lah yor mih, nar rgâl ndal, pơk trong ueh nơih ân geh âk bu bi tăp măch deh rŏ. Nau rvê lơn, tâm âk ƀon lan nkuăl jru, nkuăl ngai nau têm dak tâm ăp ndơ dâng, yăng gri ma mô geh ndrŭp nkŭm, ndrel ma nau mơng mô ŭch rep kloh lơi ăp ntŭk ndŏk nja tâm êp ngih bah du đê̆ rnăk vâl lĕ ƀư jêng ăp ntŭk deh rŏ âk măch tâm nê.

Bah năp nau tât jêr aơ, Ntŭk kan nkân njrăng srê ji bah n’gor Dak Lak dôl tâm rgop rjăp ma rmôt kan dak si ntrŭnh ƀư ân tam ăp ntrong kan. Êp nau kan mpuh dak si nkhĭt bu bi tăp măch ri nau kan ntĭm nti ân blau, jru ndrel n’hao lơn tay nau dơi dăng kan ân nau mbơh lor nau tât bah srê ji ân ntŭk kan bôk tơm geh ƀư tâm ăp ngih dak si xã, phường dôl geh uănh nâp.

Nkoch tât nau kan tơm khlay aơ, Nai dak si Lê Phúc, Groi Giám đốc ntŭk kan nkân njrăng srê ji n’gor Dak Lak mbơh:‘Phung hên n’hao prêh lơn ndrel ƀư ân ngăch lơn nau kan njrăng, rdâng véc-tơ, kơt lah mêt uănh, rklaih nkhĭt lơi bu bi tăp măch ân rmôt ăp nŭih nai dak si pah kan tâm ăp ngih dak si xã, phường. Tă bah nê n’hao lơn tay nau dăng blau kan ân khân păng gay ma tŏng dơi nau nchrăp nau nchroh mbơh ndrel njrăng rdâng tât ăp ntŭk, gay ƀư ân nơih ueh nau kan nchrăp mbơh kŏ kơt lah nau săk tam lơn tâm nau kan njrăng rdâng bah srê ji rtoh luh mham rih”.

Nsôih kan bah ntŭk kan dak si lah têh ngăn, yơn nau kan rdâng lơh ma srê ji rtoh luh mham rih rnôk aơ mra geh nau dơi rnơm nau nchrăp rdâng lor tă bah nŭih ƀon lan. Rgâl ma nau ƀư thơ tha kâp rnôk srê tât mơ dĭng njrăng ri, ăp rnăk vâl sâm dŏng 10 mnĭt ăp pơh gay nkŭp lơi ăp ntŭk dâng dak, rep kloh lơi ndŏk nja êp ngih ndrel njêng nau mơng bĭch kât mŭng tâm măng ndrel nar. Ân geh nchrăp ƀư nau kan nkre tă bah nau ƀư jê̆ ngăn gay mât ân n’hâm soan rnăk vâl ndrel mât nâp nau ueh lăng đăp mpăn ân ƀon lan nơm tâm yan mih aơ./.