Bah bôk năm tât aƀaơ, n’gor Dak Lak djôt dơn 1.518 nuĭh ntưp duh rtoh luh mham rih ta 14 ntŭk srê, hao 154% nkôp đah rơh aơ năm 2025. Dôl uănh, knŭng tâm n’gul pơh bah năp lĕ geh rlău 210 nuĭh ntưp duh rtoh luh mham rih an tât săm ta ăp ngih dak si ta lam nkual. Ăp ntŭk djôt dơn âk nuĭh ji ngăn geh phường Tuy Hòa, Buôn Ma Thuột n’hanh ăp xă Phú Hòa, Đồng Xuân, Sông Hình, Krông Ana, Ea Súp, Ea H’leo.

Nai dak si Lê Phúc, Groi Giám đốc Ntŭk uănh nđôi kop ji n’gor Dak Lak (CDC Dak Lak), an gĭt ta năp nu nău hao bah rnoh nuĭh ntưp tâm ăp nar dăch aơ, ntŭk kan dôl tâm rgop đah rmôt nai dak si ta ntŭk ăp xă phường mbơh bư rĭng ăp trong njrăng n’gang duh rtoh luh mham rih.

Tâm nĕ, rgum ntrôl dăng nkoch trêng, n’hao nău wât bah nuĭh ƀon lan mpeh răk rao ntŭk ntô, jăng lơi ntŭk deh bah măch ; nkre tâm rgop đah ăp ngih dak si nkual, ngih dak si xă, phường ƀư puh rao dak si, nkhĭt rhai dak ta ăp ntŭk srê gay n’hŭch srê ntưp rêng, tiăr nti jru an rmôt kan dak si bah dâng mpeh njrăng n’gang duh rtoh luh mham rih. “Mpôl hên n’hao n’hanh ƀư ngăch trong kan njrăng n’gang véc-tơ, jêng lah groi nđôi, mkra măch, rhai dak am rmôt dak si ta bah dâng ta ăp Ngih dak si xă, phường. Bah nĕ, n’hao dơi bah khân pơng gay tâm di nău nchroh mbơh geh ta tĭng ntŭk, gay ƀư tĭng dơh trong kan nchroh mbơh kơt săk rnglăy tâm trong kan njrăng n’gang duh rtoh luh mham rih”

Bah bôk năm tât aƀaơ, lam n’gor Gia Lai djôt dơn 1.813 nuĭh ntưp/du hê khĭt. Nkôp đah rơh aơ năm 2025, rnoh nuĭh ntưp hao 914 nuĭh. Gay nchrăp lor uănh nđôi n’hanh nking n’gang ji duh rtoh mham rih hao, Ntŭk kan Uănh nđôi kop ji lĕ ƀư mpôl pah kan mbơh ƀư groi nđôi nu nău srê duh rtoh luh mham rih, trong kan njrăng n’gang n’hanh mkra ntŭk srê ta ăp xă âk, djôt dơn âk nuĭh ntưp tâm pơh bah năp.

Na nê̆, ntŭk kan mhe ƀư groi nđôi ta xă Bình An. Mpôl pah kan lĕ pah kan đah kruanh UBND xă, Ngih dak si xă Bình An, Ntŭk dak si Tây Sơn mpeh nău kan njrăng n’gang duh rtoh luh mham rih ta ntŭk, nu nău nuĭh ji duh rtoh luh mham rih, trong kan mkra ntŭk srê, nkhĭt măch rhai dak, puh dak si, tâm rgop n’hanh ntop kơl ƀon lan mbơh ƀư mkra ntŭk srê duh rtoh luh mham rih.

Tĭng N’gâng kan dak si n’gor Gia Lai, gay trong kan njrăng n’gang duh rtoh luh mham ri săk rnglăy, ăp ntŭk an mbơh ƀư nău kan mkra ntŭk srê ; uănh khlay trong kan nkhĭt măch rhai dak, răk ntŭk ntô gŭ âm, răk ngih wâl ; n’hao nkoch trêng njrăng n’gang, duh rtoh luh mham rih ta ăp rnăk wâl, ta ăp ngih samƀŭt n’hanh ta trong mbơh tơih nău ngơi bah ƀon lan; groi nđôi măch n’hanh rhai dak gay ăp trong mkra ngăch, dêr an srê ntoh n’hanh rêng hvi.

Tât aƀaơ hin, n’gor Lâm Đồng djôt dơn 1.126 nuĭh ntưp duh rtoh luh mham rih ; djôt dơn 48 nuĭh ntưp mhe tâm pơh n’hanh 10 ntŭk srê dôl geh, rgum ta ăp ntŭk kơt : Đạ Huoai, Bảo Lộc, Di Linh, Tánh Linh, Đức Linh n’hanh Bắc Bình. Tĭng N’gâng kan dak si n’gor Lâm Đồng, bôl rnoh nuĭh ntưp geh trong hŭch đêt nkôp đah rơh aơ năm bah năp, yơn lah srê lĕ ntoh ơm, âk nkual gehg, dơi ntoh âk tâm khay tât rnôk lăp tâm yan mih hô.

Gay nchrăp uănh nđôi nuh srê, n’hŭch đêt ngăn rnoh nuĭh ntưp, nuĭh mbăn n’hanh khĭt yor duh rtoh luh mham rih, N’gâng kan dak si đă Ntŭk uănh nđôi kop ji n’gor n’hao groi nđôi nuh srê, nchrăp uănh nđôi rjăp nu nău  kop srê ta lam n’gor. Ngăch saơ ơm ăp nuĭh ji, ntŭk srê mhe ntoh gay ƀư mkra rjăp, mô an srê rêng jŏ jong. Nchrăp tŏng ăp dak si, ndoh ndơ, dak si rhŏ an trong kan njrăng n’gang srê ; ƀư uănh nđôi, groi uănh ăp rơh n’hanh ndô̆t ndal ta ăp ntŭk geh âk.