Bơi 20 năm tĭng ntŭk n’har bri, Thiếu tá, nai dak si Nguyễn Văn Quốc Trí ndrel đah âk nuĭh tahen wăn grăt pŭt Pôih tahen n’har bri Tr’hy, nkuăl Tây Giang lĕ rgŏ jă, nkoch trêng nuĭh Cơ Tu n’hao nău wât mpeh khuch bah djăt tĭng nău rlŭk mâl, jŭt jăng mbrơi mbrơi ăp nău ơm rluk mâl tâm ntŭk gŭ rêh.

Deh n’hanh têh ta nkuăl Núi Thành, n’gor Quảng Nam. Jêh rnôk tốt nghiệp Đại học Y Dược Huế (Đại học Huế) nai dak si Nguyễn Văn Quốc Trí sĭt pah kan tahen Tahen n’har bri Đăk Pring (nkuăl Nam Giang). Tât khay 5/2021, nai dak si Trí lŏ dơi tâm pleh pah kan ta Jrô but uănh Đa khoa quân dân y AXan, Pôih tahen n’har bri Tr’hy nkuăl Tây Giang, but uănh, săm ji an nuĭh ƀon lan 4 xă n’har bri bah nkuăl Tây Giang n’hanh n’ăp du đêt ƀon kêng n’har bri bah dak băl Lào. Jêh âk năm tĭng ntŭk aơ, Thiếu tá, nai dak si Nguyễn Văn Quốc Trí ndrel ăp tahen grăt pŭt lĕ rgŏ jă, nkoch trêng nuĭh Cơ Tu 2 ding n’har bri n’hao wât mpeh nău khuch bah djăt tĭng nău rlŭk mâl, jŭt jăng mbrơi ăp nău way ơm tâm ntŭk gŭ rêh.

20 năm tĭng đah ƀon lan ntŭk n’har bri, bôl moh nar, geh nuĭh tâm ƀon kop ji, khih sa sêt, n’ha klot, sŭt sôch, bih chôk, ngăn lah jŭr rnăn kon.... Kônh wa nsing nơm da dê, joi tât nai dak si Nguyễn Văn Quốc Trí. Dăch aơ, ta măng khay puh bri nđik, tăng du hê bu ur bŭn nuĭh Cơ Tu ta trong hăn sĭt deh ri rung sok, tât ji ndŭl hô, mô dơi gŭ tahen măy gay njŭn tât jrô bu uănh. Nai dak si Nguyễn Văn Quốc Trí ndrel nuĭh kan ndăn tât ntŭk mkra ngăch, oh bê lĕ deh, 2 me kon ngăch dăng da dê. 

Nkah gĭt ngăn tă bah ăp năm pah kan ntŭk nkual prêh đah nai dak Trí n’hanh nuĭh kan ndrel nar lơ âk. Khân pơng jêng ntŭk nsing nơm bah nuĭh ƀon lan. Nai dak si Nguyễn Văn Quốc Trí nkoch:

Ntŭk tahen gŭ kan lah xă AXan nkual prêh bah nkuăl Tây Giang, n’gor Quảng Nam, nuĭh ƀon lan ta aơ lah nuĭh mpôl rnoi Cơ Tu gŭ rêh, nău wăng sa n’hanh nău wât bah kônh wa hôm e đêt jêng hôm e đêt nău rlŭk mâl. Trong kan nkoch trêng rgŏ jă kônh wa mbrơi mbrơi jŭt jăng ăp nău rlŭk mâl dơi mpôl hên uănh khlay lor, mbrơi mbrơi wât bah kônh wa lĕ hao na nê̆. Tâm ăp năm mhe rlău, gâp lĕ mâp mô đêt âk nuĭh ji mbăn, kơt nuĭh ji geh bih chôk, khih sa sêt, jêh nĕ bu ur bŭn deh ta trong hăn. tâm nĕ gâp lĕ săm ngăch an âk nuĭh rlău nău mbăn.

Nai dak si Nguyễn Văn Quốc Trí ƀa ƀơ tât tĭng thôn, ƀon gay uănh nđôi săk soan, mbơh ntĭm njrăng n’gang n’hanh săm ji an dơm an nuĭh ƀon lan. Nkre, ntĭm ƀon lan trong njrăng der ăp ntil nuh srê, mât răk ntŭk ntô gŭ âm n’hanh hun hao ăp ntil tơm tăm dak si gay mât săk soan ta wâl. Wa Bling Mưr ta thôn A Banh 1, xă Tr’hy, nkuăl Tây Giang nkoch:

Nai dak si Nguyễn Văn Quốc Trí ntĭm dŭt n’hâm, uănh nuĭh ji kơt nuĭh jay nơm. Geh ăp rnôk nai dak Trí rgăn dak diăng tât thôn, ƀon gay săm nuĭh kop ji, nuĭh ranh nău rêh jêr jŏt mô geh prăk tât ăp ngih dak si gay but uanh, ăp nuĭh ji jêr bah. Rlău ma but uănh săm ji nai dak si Trí hôm nkoch trêng trong dŏng ăp trong dêr bŭn an ăp kôp ur sai mpeh trong kan njrăng n’gang kop ji.

Rĭng du năm, Jrô but uănh ji Đa khoa quân dân y AXan wơt dơn bah 6.000 tât 8.000 nuĭh ji ta 4 xă nkuăl Tây Nguyên, n’gor Quảng Nam n’hanh ăp ƀon kâng n’har bri bah nkuăl Kà Lừm, n’gor Sê Kông dak băl Lào tât but uănh n’hanh săm ji. Bah bôk năm 2016 tât aƀaơ jrô but uănh ji dơi uănh tât ndâk ƀư mhe đah têh nar lơ âk, nglăp âk ndoh ndơ dak si mhe kơt măy chŭp X-quang kỹ thuật sổ, máy xét nghiệm sinh hóa tự động, máy ƀư ôxy tự động, măy rhêt dak ntêng dŏng điện 2 bình jrŏ mpăn oh bê, 10 nsưng an nuĭh ji gŭ âm n’hanh ndeh rdêng nuĭh ji gay njŭn nuĭh ji rnôk ŭch. Thượng tá Bùi Văn Đức, Đồn trưởng Pôih tahen n’har bri Tr’hy uănh năl.

Đồng chí Nguyễn Văn Quốc Trí dơi ƀư nău tơm lĕ đah nău kan lah ntoh ang bah rmôt tahen N’har bri n’gor lah nsum kơt bah ntŭk kan lah êng. Nuĭh ƀon lan ta aơ du gâl gĭt wât hôm e đêt, yor ndoh ndơ ngih wâl trong hăn lŏ jêr jŏt, lah kơt săm ngăch mô hăn n’hanh ndơ̆ gưl bah lơ ri roh 2 tât 3 mông mư tât ngih dak si nkuăl. Yor nê, lah kơt mô geh nai dak si Trí mô săm ngăch dŭt klach tât nău rêh. Đồng chí Nguyễn Văn Quốc Trí lah ntoh ang bah ntŭk kan kơt bah rmôt tahen pôih n’har bri n’gor Quảng Nam.

Ăp nău ƀư geh âk nkô̆ nău bah nai dak si Nguyễn Văn Quốc Trí lĕ saơ nău rŏng, nău tâm rnglăp, tĭng đah tahen n’hanh nuĭh ƀon lan, jêng nău nsing nơm jru tâm nuih n’hâm ƀon lan ta nkual n’har bri. Ăp nai dak si “tahen grăt pŭt” kơt nai dak si Trí lĕ rgop uĕh nău way ơm ntoh lư bah ăp nuĭh tahen Wa Hồ ntŭk n’har bri n’gor Quảng Nam.