Tât tâm Khoa Cấp cứu, ngih dak si Đa khoa nkuăl Tây Nguyên tâm ăp nar Tết Ất Tỵ 2025, hên saơ âk nŭih nŭih dôl săm nŭih prah tâm tom ndeh, ma ngăn lah tâm rnoh nê geh ngêt ndrănh, ƀiêr, ƀư ăp nau dak si pah kan mro, mô geh rnôk rlu. Lơn ma măng, ngăn lah ăp nar tết ri ta aơ lơn ma âk nŭih tât săm, ngăn lah tâm tom ndeh yor ngêt ndrănh, ƀiêr.

          Tĭng nau kơp bah Khoa cấp cứu, tâm du nar ndơn ntơm 20-30 nŭih tâm tom ndeh geh tât ndrănh, ƀiêr. Nar lễ, Tết ri hao âk ntơm 60-70 nŭih. Âk nŭih ngêt ndrănh ƀiêr khuch hô, mra khĭt, ƀư nau săm lơn ma mâp âk nau jêr, ân geh năl khoa bah ăp khoa gay ma năn rklaih, săm. Lah nŭih ji đê̆ kŏ mô hôm nkah, khĭt yơh, khuch tât rnôk ôp, săm. Mô lah geh nŭih ji mô lah nŭih hăn ndrel yor nhŭl, mô dơi nkân săk, mô geh mât nâp săk nơm jêng tâm lơh, kăl nŭih nai dak si...Ăp nau aơ lơn ma ƀư mbrơi ma nŭih săm ji, ƀư khĭt nŭih. Nkoch tât nau jêr tâm rnôk ndơn săm nŭih khuch tâm tom geh ngêt ndrănh ƀiêr, yuh Trần Thị Anh, điều dưỡng Khoa Cấp cứu, mbơh:

          Âk nŭih rmanh yor ngêt ndrănh ƀiêr, mô dơi nkân sakư nơm ri ma geh rnôk joi nau lơh nai dak si mô lah ƀư jêr, ngơi nau mô tâm di, ƀư mô ueh ri ma kŏ ƀư oh nô pah kan mô ueh tâm bôk rngok nơm. Mâp ăp nŭih nê ngăn lah hên bonh săk nơm yor khân păng ngêt ndrănh, mô ueh tâm bôk rngok dĭng geh kơt nê ri ma nơm nsôih ân ueh nau kan bah nơm. Âk nŭih hôm ndjôt payh tĭng sreh ma nŭih nai dak si. Jêh rnôk nŭih ji bah oi ri hên lŏ ƀư nau leo săm ân nŭih ji. Phung hên du gưl yor ŭch ma nau kan, du gưl ri mĭn ân ma bu, yor bu nuih n’hâm mô ueh ri ma geh nau jêng kơt nê.

          Ndrel ma nau rvê đah nê, yuh Nguyễn Thị Châu, Điều dưỡng Khoa cấp cứu, Ngih dak si Đa khoa nkuăl Tây Nguyên, ngơi:

          Gâp pah kan ta aơ geh 17 năm. Ntơm nar hăn kan ta aơ ri nŭih geh prah tâm tom ndeh geh tât ngêt ndrănh ƀiêr âk ngăn. Tâm tom ma geh ndrănh ƀiêr ri khân păng geh nau mô ueh ngăn tâm săk, lêt săk, mô ueh tâm bôk rngok, nau ngơi ƀư mô ueh nau kan rnôk săm ji... Khân păng lăp săm tâm rnôk kơt nê ri nau ƀư kŏ mô ueh ma nai dak si ơm. Geh rnôk bu rak soau, joi nau, mô ŭch tâm kơl ma nŭih săm. Ngăn lah tâm 17 năm pah kan geh âk nŭih lăp săm dôl ma ji, ngơi lă lêng, rak soai, ngơi mô tâm di, yơn lah jŏ ri jêng mơng đŏng. Mhe bôk năp ri gâp ko rngot đŏng, âk rnôk mô ŭch ƀư nau kan, đah khoa ôh, ƀư nơm mĭn aơ lah nau kan, ma nau kan ri nơm ân nsôih.

          Nau ƀư tâm săm nê lah nai dak si, kơl an ân nŭih ji jâk lơn gay ma rgum săm lor, jêh nê mơ tât nŭih ji bah găp ndrel nau năl ji jâk đŏng lah mô ri nai dak si mơ geh dơi năl. Geh ăp nŭih bah dih săk mô saơ mpơl, yơn lah khuch tâm trôm săk. Rlŏ ma nê, lŏ geh nŭih sôt bah dih, luh mham, uănh ma măt ri kơt lah jâk, yơn knŭng sôt tâm ntô, luh mham, mô geh ji jâk ôh. Yơn lah, âk nŭih ji, băl mpôl rvê ir, duh nuih ân geh săm ơm ri ma đă săm ngăch, geh nau ngơi mô tâm di, mô lah geh nŭih hôm dong nai dak si.

          Tĭng nai dak si CKII Nguyễn Doãn Sơn, Groi Jrâu kan Khoa cấp cứu, nau jêr bah ăp nai dak si rnôk săm nŭih tâm tom ndeh geh ngêt ndranh ƀư jể rnôk năl. Âk nŭih mô dơi geh năl lah nŭih ji lêt khĭt yơh yor ngêt ndrănh, mô lah yor rmanh tâm săk. Tâm rnôk nau săm bah nau dak si lah ân uănh, pah tâm geh năl nau ji ndrel geh ôp nŭih ji. Yơn đah nŭih ji dôlsăm ma ngêt ndănh ri môdơi geh ƀư, ƀư jêng nau mô khĭt kloh rnôk ôp, mô năl nau ji. Nai dak si Nguyễn Doãn Sơn, mbơh:

          Ăp nŭih ngêt ndrănh ƀiêr lah tâm tom ndeh ri păng geh ji khuch tâm lam săk. Mô geh năl lah khĭt yơh yor geh tâm bôk ngok mô lah yor ngêt ndrănh. Rnôk ngêt ndrănh ri luh mham jŏ lơn, rnoh mham luh âk ri ma rnôk rklaih, ân nkân luh mham, put ntŭk sôt mra jêr lơn, khuch ngăn tât ăp ntŭk ndrel du tŏ. Nau jêr lah nơm nơih mô năl ntŭk ji êng. Ngăn lah nau tât ji bah rngok.

          Nau ngăn ân saơ, ngêt âk ir ndrănh, ƀiêr ƀư mô dơi nkân nau khuch lơi ân ba kơi âk nau khuch tât n’hâm soan, geh nŭih mô dơi ndâk, roh nau dăng pah kan, rven mro mrăng ndrel âk nŭih khĭt nkre. Ndri ma, ăp nau dak si khoa cấp cứu hĭ đă ƀon lan lah ngêt ri mô dơi ngêt âk. Lah geh ngêt ndrănh, ƀiêr mô dơi ƀĭt ndeh, mô dơi hăn trong, lah hăn ri nchoh neh bu rdeng ân gay ma mât n’hâm soan ndrel nau rêh nơm ndrel bu êng.

         Êng đah ăp khoa săm ji ƀa ƀă, ăp y, nai dak si ta khoa săm ngăch ndal pah kan mô geh mông rlu rlău. Aơ lah ngoăy tâm âk nău kan ŏk r’ah n’hanh âk nău jêr, klach ngăn tâm ngih dak si. Gay wât tay ăp jêr jŏt, ŏk r’ah bah rmôt nai dak si pah kan săm ngăch ndal, rmôt nchih nkô̆ way nkoch lĕ geh rơh tâm nchră tay đah nai dak si CKII Nguyễn Doãn Sơn, Groi Kruanh Khoa săm ngăch ndal Ngih dak si Đa khoa nkual Tây Nguyên, bah nĕ geh nău wât lơn, yô̆ n’đach lơn đah ăp cán bộ nai dak si ta aơ!

- Ơi nai dak si, pah kan ta khoa săm ngăch ndal jêr jŏt m’hâm mêh?

- Nai dak si Sơn: Kan ta Khoa săm ngăch ndal dŭt ŏk r’ah, dŭt njê âk nău, moh ntil khoa săm ngăch ndal da dê. Săk gâp nơm lĕ kan ta aơ geh 7 năm yơn lah an săch, gâp mbra săch pah kan ta ăp khoa êng. Yor khoa săm ngăch ndal jêr jŏt ŏk r’ah dŭt têh, geh mâp nău tih âk jêng nai dak si tâm nu nău ŏk r’ah. Yơn lah aơ nău kan dơi pă jao jêng mpôl hên tâm ntrŭt ntrôl ndrel rlet rlău âk jêr jŏt. Knŭng geh du hê nuĭh ji lăp săm ngăch ndal rlet rlău nău mbăn, dơi ngăch dăng plơ̆ tay ăp nău ŏk r’ah, jêr jŏt bah mpôl hên lŏ rlet rlău. Dôl nkah gĭt ngăn geh du hê prah tâm tom ndeh rnoh sôt săk n’gơch, mpôl hên lĕ wơt dơn n’hanh but uănh knŭng an ndơ̆ hăn xét nghiệm lor yơn mô hŏ ngăch ƀư tĭng nău đă nuĭh ji, tâm nuĭh geh ƀô ndrănh, nter, lah ngơi aơ ri. Jêh rnôk bu uănh an nuĭh ji, nu nău đăp mpăn ri khoa ƀư sam ƀŭt yor geh nău ngơi tih, ntêt nkri, ŭch lơh nai dak si. Rnôk aơ nuĭh rnăk wâl dăn yô̆ n’hanh nuĭh ji jêh nĕ tât dăn yô̆. Ntêt nkri cán bộ nai dak si êng lah du hê nuĭh ji hăch klơm. Khoa lĕ ƀư jă ăp nai dak si khoa êng tât nchroh, mkra rek lôch jêh ri nar bah kơi khân pơng plơ̆ tay n’hanh lah ueh n’hanh dăn yô̆ yor geh ăp nău ngơi tih mưch y nai dak si.

- Nău nuĭh ji, nuĭh rnăk wâl ƀư jêr jŏt an y, nai dak si mbra khuch m’hâm tât trong kan săm ngăch ndal nuĭh ji hơi nai dak si?

- Nai dak si Sơn: Lăp khoa săm ngăch ndal ri jêng đêt âk lĕ geh khuch đah săk soan hôm yơn geh nuĭh geh n’gơch dơm khân pơng ƀư lơ têh, lah ngơi lêng lang, an lah cán bộ nai dak si thơ tha, tâm rnôk mpôl hên dôl an mkra, uănh nđôi ăp nuĭh ji mbăn êng. Way ăp nuĭh mô hŏ dơi but uănh mbra mĭn mpôl hên dăn prăk, khân pơng geh nău lah, uănh n’gơch n’hanh nking n’gang tâm nău way kan bah mpôl hên. Khân pơng sŏk điện thoại ôp ndal bah ngih dak si, kuăl an kruanh ngih dak si. N’hêl na nê̆ lah mpôl hên an dăp nuĭh ji mbăn mkra lor, nuĭh n’gơch bah kơi, mô di nuĭh ji lăp lor mbra dơi săm ngăch ndal lor. Lah nuĭh ji dơi wât, nta an mpôl hên ri dŭt uĕh. Hôm lah mô, mpôl hên an kơt dŏng tĭng nău ntrŭnh, trong rmal bah N’gâng kan dak si gay ƀư mô dơi ƀư tĭng nău đă bah nuĭh ji. Nău nuĭh ji, nuĭh rnăk wâl lah, janh, lơh dông khuch dŭt têh tât nău mĭn bah y, nai dak si. Lah nău nĕ geh ntơm tă bah nar kâp ri nuĭh nai dak si mbra ji nuih, ŏk r’ah lôch nar kâp săm ji.

- Ndrĭ nai dak si geh nău boăi rkleh đŏng đah nuĭh ji, nuĭh rnăk wâl rnôk tât săm ngăch ndal ta ngih dak si đŏng?

- Nai dak si Sơn: Rnôk nuĭh rnăk wâl, nuĭh ji săch ngih dak si gay săm ngăch ndal lah lĕ geh nău nsing nơm tâm nău way kan n’hanh nău wât bah cán bộ nai dak si ta nĕ. Mpôl hên lah ăp nai dak si, nuĭh kan dak si pah kan ta gưl bôk năp âk jêr jŏt, ŏk r’ah yơn tât rnôk aơ hôm e tĭng đah khoa săm ngăch ndal ri mpôl hên lah ăp nuĭh lĕ đah nău kan. Nuĭh ji lĕ nsing n-ơm ri tâm rgop đah nai dak si, ryơk nău way kan bah mpôl hên gay nuĭh ji dơi săm du trong uĕh ngăn. Mpôl hên lĕ dơi ntĭm nti ngăn ngên, dơi tiăr nti săm ngăch ndal, dơi tiăr nti mkra pă uănh nău ji, ăp nuĭh ji an mkra dâl mpôl hên mkra lor an nuĭh ji, mô klach jêr jŏt, mô tâm nkhah bu ur bu klô kon se, bu ranh. Aơ lah ăp nău nkoch ngăn ngên bah gâp njuăl tât ăp nuĭh ji, nuĭh bên rnôk tât săm ngăch ndal ta Ngih dak si Đa khoa nkual Tây Nguyên.

Ơ, dăn lah uĕh ăp nău noch bah nai dak si.