VOV4.M’nông: Nar ntri (28/5) Thủ tướng Nhật Bản Yoshihide Suga hŏ geh rơh kuăl điện tâm nchră đah nuĭh ndrel gưl kan Anh Boris Johnson, bar ding tâm ban ŭch n'hao dăng tâm boh lhăt gay ƀư jêng ngăn ngăn du nkual Ấn Độ-Thái Bình Dương dah rŏng n'hanh pơk hvi. Bộ Ngoại giao Nhật Bản an gĭt, bar kruanh rđău kan lah rjăp nău tâm boh lhăt nchrăp an trong hăn khâl bah du rmôt duk tâm lơh bah Anh tă bah tàu tach ndeh păr HMS Queen Elizabeth leo hăn. Nchrăp, tàu Queen Elizabeth mbra weh khâl ndrâm dak lêng 40 dak, tâm nê geh Hàn Quốc, Ấn Độ n'hanh Nhật Bản, đah trong nchrăp râng rơh nti tâm lơh nsum ndrel mpôl tahen mât njrăng êng Nhật Bản. Bah meng nê, kruanh rđău kan bar dak tâm ban ŭch tâm boh đăp mpăn geh nău dơi Tâm nchră gưl têh G7 ta Anh, tâm khay tât đŏng./.

Nuĭh rblang: Điểu Thân