VOV4.M'nông: Nhật Bản n'hanh Anh mhe ƀư nti tahen nsum ta nkual dak lêng mpeh bah dâng gôl dak Okinawa. Bộ Quốc phòng Nhật Bản an gĭt hŏ đă tàu khu trục Ise bah Mpôl tahen njrăng n'gang êng dak lêng hăn tât nti ndrel rmôt hăn lơh geh tàu tach ndeh păr Nữ hoàng Elizabeth bah Anh. Aơ lah lor bôk năp tàu tach ndeh păr dŭt têh bah Anh dja râng nti nsum ta nkual dăch kêng Nhật Bản. Rlău ma nê, râng rơh nti hôm geh tàu tahen dak lêng Mỹ n'hanh Hà Lan, aơ lah ăp bôk tàu gŭ tâm rmôt hăn lơh bah tàu tach ndeh păr Nữ hoàng Elizabeth. Nữ hoàng Elizabeth lah tàu tach ndeh păr uĕh têh mhe bah Anh, dơi pâng đah nău hưp ndơ̆ Tahen dak lêng Hoàng gia Anh plơ̆ tay rơh têh dăng. Rmôt tàu rdôl lơh dja hăn bah ndrâm dak lêng hăn tât châu Á ntơm bah khay 5 gay mpơl nău uănh khlay bah Anh đah nkual Ấn Độ Dương-Thái Bình Dương./.

          Nuĭh rblang: Điểu Thân