Rlet rlau 35 năm ndâk njêng ndrel hun hao, rmôt nklih rup bu ur Hải Âu-ntŭk nsum bah ăp bu ur nklih rup geh nau blau ndrel geh nau bu rnơm tâm ntŭk kan nghệ thuật hŏ nkah ăp nau geh dơi blau ngăn ngên, ndrel âk nŭih tâm rmôt aơ hŏ geh nchih tâm rnoh moh săk tâm rmôt nklih rup Việt Nam ndrel dak ba dih. Di nkah 35 năm ndâk, rmôt nklih rup Hải Âu geh âk ndrôm săm ƀŭt rup geh nkô̆ “Âl ntil tâm nau rêh bah ăp rnoi mpôl Việt Nam”.

  54 plơk rup ueh geh mpla rnôk ăp lah ăp rup ueh săch tă bah 298 blah, bah 25 nŭih tâm săm ƀŭt eup “Âk ntil tâm nau rêh bah ăp rnoi mpôl Việt Nam”. Wa Nguyễn Hồng Nga, Uỷ viên Rnâng kan rđau kan rmôt nŭih nklih rup Việt Nam, Groi Kruanh rmôt nklih rup Nkuăl ƀon têh Hồ Chí Minh, Groi Kruanh rmôt nklih rup Hải Âu, mbơh:

  ‘Gay geh ăp păng rup ndrel rup in tâm săm ƀŭt “Âl ntil tâm nau rêh ăp rnoi mpôl Việt Nam”, rmôt kan hên hŏ geh rlet 2 năm ndrel săch tă bah âk rbăn păng rup gay ma săch ăp rup ueh ngăn leo lăp tâm ndrôm săm ƀŭt ndrel ma mpla aơ. Aơ lah nkô̆ nau jêr, rnôk aơ geh 36 rnoi mpôl phung hên leo rup tâm săm ƀŭt lah du nau nsôih têh. Yor tâm ăp rnoi mpôl ri geh âk rnoi nkhah, phung hên leo ăp rnoi nê tă bah mpeh Bắc tât Nam, ntơm nkuăl yôk prêh tât nkuăl rđŭng, nkuăl jru, ăp ntŭk ma hên hŏ tât tâm lôch 35 năm”.

Râng nau mpla n’hơ, âk nŭih geh uănh âk ntil nau ueh bah bri gleh, kon nŭih ndrel nau ơm yau bah ăp nkuăl neh bah ăp nau geh uănh geh âk nau dơi ndrel nau jru bah ăp nŭih bu ur klih rup tâm rmôt Hải Âu.  Wa Nguyễn Trùng Nhị, nkuăl ƀon têh Hồ Chí Minh, mbơh:

‘Nau geh năl uănh bah ăp oh nur tâm rmôt nklih rup Hải Âu ân saơ geh ăp nau mbơh nchră, nau mĭn tât nŭih rnoi mpôl đê̆ âk ngăn, geh âk nau ryơk dơi, păng leo tât nau ueh ơm, nau ueh êng bah ăp rnoi mpôl tâm nau vay nsum bah Việt Nam’.

Oh Trà My, sinh viên Ngih săm ƀŭt Đại học Rmit, mbơh:

‘Tât ma nau mpla n’hơ nar aơ, gâp saơ ŭch ngăn du gưl nê lah ăp ntil màu, dĭng lĕ ăp rup nê kŏ geh màu ueh ngăn. Kon nŭih geh trah mô êng mpeh ăp nau ueh tâm muh măt ma hôm geh trah tâm ăp păng rup, kon nŭih tâm bri gleh yôk nor ndrel kon nŭih tâm ntŭk ma bu ntơm geh têh jêng”.

  Êp ăp nau kan mpla n’hơ, rmôt kan Hải Âu hôm sŏk du gưl prăk tă bah nau tăch rup, săm ƀŭt rup ndrel nau mpla n’hơ gay ma ƀư prăk hăn kơl an, nsum ty kơl an ăp nŭih mâp nau jêr, ngăn lah ăp nŭih geh ntưp dak si Đioxin. Mpla n’hơ “Âk ntil tâm nau rêh ăp rnoi Việt Nam’ pơk mpông dah rŏng ŭch uănh tâm Bảo tàng Bu ur Việt Nam tât lôch lơ 15/10./.