Rveh lah du rup ndah văn hóa bah Tây Nguyên, dơi uănh kơt nkual neh rveh ta Việt Nam. Tâm nău rêh văn hóa nuih n’hâm bah nuĭh Êđê, Bunong geh nău mĭn, nău rŏng kơt kon nuĭh. Yor nê rveh way ngêt sa ăp ƀư brah gay nkoch nău rŏng, ryơk đah rveh. Wa H’Hiên Êban du hê tơm rveh ta ƀon Ea Mar, xă Krông Na, nkuăl Buôn Đôn, n’gor Dak Lak an gĭt, rve dŭt khlay, kơt nuĭh bên tâm rnăk wâl, rveh hôm rup ndah an nău têh ndrŏng, soan dăng drăp ndơ n’hanh nuih n’hâm bah rnăk wâl, nsum mpôl. Bah kăl e rveh hăn ndrel tâm nău rêh bah kônh wa, yor nê aƀaơ rnăk wâl wa H’Hiên Êban hôm e ntô̆ n’hao, n’hanh uănh đah rveh kơt nuĭh tâm rnăk wâl.

“Du năm an ƀư brah an rveh 2 tơ̆. Lah geh ndơ he mbra ƀư brah du tơ̆ đêt ngăn du mlam sŭr. Hôm mô geh ri ƀư brah jêt tâm rnăk wâl. Rveh dŭt khlay tâm nău rêh bah kônh wa. Kăl e hôm e bri, rveh dô̆t si sĭt ƀon, rdêng ba bah mir sĭt jay, tâm lơh tâm su rveh hăn rdêng ndơ sa, phao, ndrăk nsiu kơl tahen lơh rlăng tay”.

Năch pâl nđaih tât đah Buôn Đôn, Dak Lak lah tât đah ăp nău nkoch kăl e đah kđăch rveh. Ăp ndơ, nău têl hôm e mât ndrăy, ăp nău way ơm geh tât nău rêh bah rveh lĕ jêng ndơ pâl nđaih wăch rgum năch. N’hanh rveh lah rup guo mô dơi mô geh ta ăp nkual pâl nđaih ta Buôn Đôn n’hanh Lắk. Lĕ geh âk năm jŏ jong, ăp công ty pâl nđaih n’hanh năch dŏng rveh mô tâm di, khuch tât săk rveh ƀon. UBND n’gor Dak Lak lĕ geh sam ƀŭt đă ƀư ntrong kan “Pâl nđaih dăch bên đah rveh” n’hanh ƀư ndâk njêng ăp ndơ rhŏ mhe geh tât rveh. Nô Lê Minh Dũng, năch ta Bà Rịa-Vũng Tàu nkoch rnôk ƀư ngăn ntrong kan pâl nđaih aơ.

“Hăn đah Buôn Ma Thuột, Dak Lak an uănh rveh, an dơi saơ ta măt ăp kon rveh, nuĭh mât rveh. Gâp lĕ tă tâm rlong rveh, ncho rveh yơn rơh aơ hăn pâl nđaih ta aơ geh 3 nău ƀư khlay n’hanh mô geh tâm rlong rveh tay. Tât aơ tay gâp dŭt răm dŭt ŭch yor mpôl rdâk ƀư pâl nđaih uĕh wơt năch pâl nđaih ăp ntŭk kơt rveh ôp ngơi năch, rveh sa buffet n’hanh nkrơh chŭp rup đah năch. Aơ lah rơh tal 4 gâp pâl nđaih ta Buôn Đôn”.

Aƀaơ n’gor Dak Lak knŭng hôm 37 mlâm rveh, tâm nĕ 14 bôk ta Lắk, 22 bôk ta Buôn Đôn n’hanh du bôk ta nkuăl Krông Ana. Ăp mlâm rveh ƀon hŭch âk yor rveh khĭt yor ranh. Ta năp nău ngăn rnoh rveh ƀon hŭch dôl mbơh njrăng, UBND n’gor Dak Lak uănh an nău nchrăp ƀư ntop kơl kỹ thuật nău ƀư rgâl ntrong kan pâl nđaih ncho rveh an ntrong ƀư pâl nđaih dăch bên đah rveh. Tĭng nĕ, mpôl rveh ƀon dơi mât ndrăy, mât rong, đăp mpăn nău geh, jŏ rêh; nuĭh tơm n’hanh rveh dơi ntop kơl nău geh yor mô tŏng tă bah rlu nău rhŏ kan ncho rveh. Aƀaơ Rmôt kan Mpa bri châu Á lĕ ton ntop kơl rlău 2,2 rkeh đôlar gay ƀư tĭng nău nchrăp ƀư mât ndrăy rveh, năm ƀư tĭng bah năm 2022- 2026. Rmôt kan aơ lĕ nking n’gang nău geh đah 12 bôk rveh, tâm nĕ 8 bôk rveh dôl râng tâm ntrong kan ƀư ngăn rveh dăch bên ta Bri Ngih dak Yok Đon. Năch pâl nđaih uănh nsong mbra mô nchoh rve, rgâl tâm nĕ uănh rveh n’hanh uănh bri tâm ntŭk ntô bri dak. Wa Hockley Ryan Jonathan, lah nuĭh way kan bah rmôt kan Mpa bri châu Á an gĭt:

“Mpôl hên lah ăp nuĭh ntoh măt an rmôt kan Mpa bri châu Á dôl ƀư tĭng nău nchrăp ƀư mât ndrăy rveh ta bri ngih dak Yok Đon, n’gor Dak Lak. Mpôl hên mpŏng tâm rgŏ năp mbra uănh mĭn tay ƀư tĭng nău nchrăp ƀư aơ ta nkual êng kơt ta nkuăl Lăk lah ndơ̆ rveh tâm bri kơt Bri Ngih dak Yôk Đôn. Ndơ̆ ăp rveh lĕ ranh sĭt đah bri. Yơn lah mô di rnôk ƀư tĭng nău nchrăp ƀư ndơ̆ rveh tâm bri lah nuĭh ƀon lan Việt Nam mô uănh saơ rveh tay. Mpôl hên ŭch nuĭh ƀon lan ta ntŭk hôm e dơi mât rong rveh, nuĭh Việt Nam mbra geh âk tuor pâl nđaih chop rveh tâm bri. Mpôl hên mpŏng bah kơi aơ ăp rveh mbra mô ntoh tâm lễ hội ma mbra ntoh tâm bri Yôk Đon n’hanh Lắk”.

Ndrel đah nău ntrŭnh bah n’gâng kan ƀon lan n’hanh nău kan dơi kan tâm nău mât ndrăy mpôl rveh ƀon, ăp nuĭh tơm rveh an uănh mĭn lơn tât săk soan bah rveh-ơm dơi uănh kơt nuĭh tâm rnăk wâl. Năch pâl nđaih ŭch đah rveh an uănh dăch bên lơn, gay rup ndah rveh uĕh mro mô dơi chuêl rnôk tât đah Tây Nguyên.